काठमाडौं : भारत, बंगाल, कोलकाता पुस्तक मेलामा एक अभिनेत्री पर्स चोरेको आरोपमा पक्राउ परेपछि हंगामा मच्चिएको छ ।

कोलकाता प्रहरीले अभिनेत्री रूपा दत्तलाई चोरीको आरोपमा पक्राउ गरेको हो । यो घटना अन्तर्राष्ट्रिय कोलकाता पुस्तक मेलाको समयमा भएको थियो ।

एक टिभी कार्यक्रममा काम गरेकी रुपा दत्तलाई शनिबार प्रहरीले खाली पर्स फोहोरको झोलामा फालेको देखेपछि पक्राउ गर्यो ।

बिदाननगर उत्तर प्रहरी थानाका एक अधिकारीले यो जानकारी दिएका छन् । त्यसपछि प्रहरीले उनलाई हिरासतमा लिएर धेरै प्रश्न सोध्दा उनी छक्क परिन् ।

सोधपुछका क्रममा उनको झोलामा कैयौं पर्स र ७५ हजार भारु नगद बरामद गरिएको प्रहरीले जानकारी दिएको छ । रुपामाथि ध्यान हटाएर चोरी गरेको आरोप लागेको छ ।

यस घटनामा रुपासँगै अन्य व्यक्तिहरु पनि संलग्न छन् वा छैनन् भन्ने विषयमा प्रहरीले थप अनुसन्धान गरिरहेको छ ।

यसअघि पनि रुपा दत्तले फिल्म निर्माता अनुराग कश्यपमाथि यौन उत्पीडनको आरोप लगाएपछि चर्चामा आएकी थिइन् ।

उनले सामाजिक सञ्जालमा एक व्यक्तिसँगको कुराकानीको स्क्रिनसट शेयर गरेर आतंक मच्चाएका थिइन् ।

यसमा प्रसिद्ध फिल्म निर्माता निर्देशकको नाम समावेश थियो । तर, प्रहरीले यस घटनाको अनुसन्धानमा ठोस केही फेला पार्न सकेको छैन ।

रुपालाई पक्राउ गरी अदालतमा पेस गरिने छ, जहाँबाट उनलाई न्यायिक हिरासत वा धरौटीमा पठाउने निर्णय गर्न सकिने प्रहरीले जानकारी दियो ।