गैँडाकोट। नेपालीहरूको महान् पर्व बडादसैँलाई लक्षित गर्दै गैँडाकोट नगरपालिका–२ को वडा कार्यालयले लिङ्गे पिङ निर्माणका लागि आर्थिक सहयोग गर्ने भएको छ। लोप हुँदै गएको मौलिक परम्परा र संस्कृतिको संरक्षण गर्ने उद्देश्यले वडाभित्रका १० वटै टोल विकास संस्थालाई सहयोग उपलब्ध गराउन लागिएको हो।

वडाध्यक्ष प्रकाश सापकोटाका अनुसार दसैँ, तिहार तथा छठ पर्वको अवसरमा स्थानीय कला, संस्कार र संस्कृतिको जगेर्ना गर्न प्रत्येक टोल विकास संस्थालाई लिङ्गे पिङ निर्माणका लागि अनुमानित खर्चबापत रु. ५ हजार ५०० उपलब्ध गराउने निर्णय गरिएको छ।

वडाध्यक्ष सापकोटाले नेपाली समाजमा परम्परागत रूपमा प्रचलनमा रहेको लिङ्गे पिङ पछिल्लो समय विभिन्न कारणले गाउँघरबाट हराउँदै जान थालेकाले यसको संरक्षणका लागि वडा कार्यालयले पहल गरेको बताउनुभयो।

उहाँका अनुसार टोल विकास संस्थाहरूले आफ्नो क्षेत्रमा लिङ्गे पिङ निर्माण गरेपछि आवश्यक बिल तथा भरपाई पेस गरी वडा कार्यालयबाट भुक्तानी लिन सक्नेछन्।

“संस्कार र संस्कृति जोगाउन सकेमा हाम्रो सभ्यता जोगिन्छ। सभ्यता जोगिएमा मात्र हामी नेपाली हौँ भनेर गर्व गर्न सक्छौँ,” सापकोटाले भन्नुभयो। उहाँले स्थानीय कला, संस्कार र संस्कृतिको संरक्षण गर्नु स्थानीय सरकारको दायित्वसमेत भएको उल्लेख गर्नुभयो।

दसैँका बेला गाउँघरमा लिङ्गे पिङ हाल्ने र सामूहिक रूपमा रमाइलो गर्ने परम्पराले नेपाली समाजमा विशेष महत्त्व राख्दै आएको छ। यही परम्परालाई निरन्तरता दिँदै नयाँ पुस्तामाझ मौलिक संस्कृतिको महत्त्व स्थापित गर्ने उद्देश्यले वडा कार्यालयले आर्थिक सहयोगको व्यवस्था गरेको हो।