गैँडाकोट। नवलपुरको गैँडाकोट नगरपालिका–४, रानीतालस्थित सामुदायिक वनमा गाडिएको शव उत्खनन गरी क्षति पुर्याएको आरोपमा प्रहरीले ३१ वर्षीय शक्ति परियारलाई पक्राउ गरेको छ।
असोज २४ गते निधन भएकी ४९ वर्षीया कनिमाया गुरुङको शव गुरुङ परम्परा अनुसार नजिकैको सामुदायिक वनमा गाडिएको थियो। असोज २६ गते बिहान करिब ७ बजे काजक्रियाको अन्तिम दिनको विधि पूरा गर्न समाधिस्थल पुगेका आफन्तले शव गाडिएको स्थान खनिएको र शव खुला अवस्थामा रहेको देखेपछि प्रहरीलाई खबर गरेका थिए।
घटनाबारे जानकारी पाएलगत्तै इलाका प्रहरी कार्यालय गैँडाकोटका प्रमुख प्रहरी निरीक्षक लक्ष्मण गिरीको नेतृत्वमा प्रहरी टोली घटनास्थल पुगेको थियो। प्रहरीले घटनाको अनुसन्धान तथा खोजतलास गर्ने क्रममा शव गाडिएको स्थान खनी क्षति पुर्याएको आरोपमा शक्ति परियारलाई पक्राउ गरेको हो।
प्रहरीका अनुसार पक्राउ परेका परियार तनहुँको देवघाट गाउँपालिका–५ का स्थायी बासिन्दा हुन्। उनी हाल गैँडाकोट नगरपालिका–४, रानीताल क्षेत्रमा बस्दै आएका थिए।
परियारविरुद्ध धर्मसम्बन्धी कसुरअन्तर्गत चिहान खनेको आरोपमा मुद्दा दर्ता गरिएको प्रहरीले जनाएको छ। नवलपुर जिल्ला अदालतबाट सात दिनको म्याद थप गरी घटनाको थप अनुसन्धान भइरहेको छ।
शव गाडिएको स्थान खन्नुको कारण तथा घटनामा संलग्न हुनुको उद्देश्यबारे प्रहरीले थप अनुसन्धान गरिरहेको जनाएको छ।
