चितवन, असोज ७– चितवन राइनोजले नेपाल प्रिमियर लिग सिजन–३ को आधिकारिक हाइप गीत ‘गैँडा ग्याङ’ सार्वजनिक गरेको छ । सिजन ३ को पहिलो र्यापका रूपमा सार्वजनिक गरिएको यस गीतले क्रिकेट, संगीत, युवा संस्कृति र चितवनको विशिष्ट पहिचानलाई एकै ठाउँमा जोडेको छ ।
“हामीलाई विश्वास छ, यो गीतले हाम्रा समर्थकहरूलाई टोलीसँग अझ नजिक जोड्नेछ र गैँडा ग्याङलाई आफ्नै आवाज र पहिचान दिनेछ,”–गीत सार्वजनिक पछि चितवन राइनोजका अध्यक्ष तथा प्रबन्ध निर्देशक आयुष न्यौपानेले भने ।
र्यापरद्वय महेश डोङ (डोङ) र अमृत थारूको प्रस्तुति रहेको यस गीतले टी–२० क्रिकेटको ऊर्जा, जोश र तीव्रतालाई चितवनको पहिचानसँग जोडेर प्रस्तुत गरेको छ । राइनोजको पहिचान र समर्थकहरूको सामूहिक भावनालाई केन्द्रमा राखेर तयार गरिएको ‘गैँडा ग्याङ’ ले चितवन राइनोजको फ्यान कल्चरलाई आफ्नै मौलिक सांगीतिक पहिचान दिएको छ ।
चितवन राइनोजका लागि चितवनको प्रतिनिधित्व क्रिकेटमा मात्र सीमित छैन । फ्रेन्चाइजले सुरुदेखि नै चितवनको पहिचान, समुदाय र सिर्जनात्मक पक्षलाई आफ्नो यात्रासँग जोड्दै आएको छ । यही निरन्तरतामा ‘गैँडा ग्याङ’ मा थारू र्यापर अमृत थारूको सहभागिताले गीतलाई स्थानीय समुदाय र चितवनको सांस्कृतिक पहिचानसँग अझ बलियो रूपमा जोडेको छ ।
मूल रूपमा ‘गैँडा ग्याङ’ पहिचानको गीत हो । चितवन राइनोजको प्रतीकात्मक गैँडा र समर्थकहरूको सामूहिक भावनाबाट प्रेरित यस नामले एउटै टोलीको समर्थनमा एकजुट समुदायलाई प्रतिनिधित्व गर्छ । र्याप, लय र स्थानीय सांस्कृतिक प्रभावमार्फत गीतले गैँडा ग्याङको आवाजलाई स्टेडियमभन्दा बाहिर डिजिटल संसार र एनपीएल वरिपरिको युवा संस्कृतिसम्म पुर्याउने प्रयास गरेको छ ।
‘गैँडा ग्याङ’ को सार्वजनिकसँगै चितवन राइनोजले एनपीएलको अनुभवलाई मैदानको सीमाभन्दा बाहिर विस्तार गरेको छ । संगीतमार्फत क्रिकेटलाई चितवनको संस्कृति, सिर्जनशीलता र आफ्नो पहिचान निर्माण गरिरहेको पुस्तासँग जोड्ने प्रयास गरिएको छ ।
नेपाल प्रिमियर लिग सिजन ३ नजिकिँदै गर्दा चितवन राइनोज आफ्नो पहिचानलाई मैदानबाट प्लेलिस्टसम्म पुर्याउन तयार छ । टोली, समर्थक र चितवनको भावनालाई प्रतिनिधित्व गर्ने आफ्नै सांगीतिक आवाजसहित गैँडा ग्याङ तयार भएको छ । गर्जनको आफ्नै लय छ । गैँडा ग्याङ आइपुगेको छ ।
