चितवन : चितवनका कृषकहरुले दुधको मूल्यमा तत्काल वृद्धि गर्न माग गरेका छन् । चितवन जिल्ला दुग्ध उत्पादक सहकारी संघले आइतबार पत्रकार सम्मेलन आयोजना गर्दै दूधको मूल्य लिटरमा १० रुपैयाँ तत्काल बढाउन माग गरेको जानकारी दिएको हो ।
उपभोग्य वस्तुको मूल्य बढ्दा किसानले प्रति लिटर दूधमा ८ देखि १० रुपँया घाटा बेर्होनु परेकोले सरकारलाई दूधको मूल्य बढाएर न्यूनतम ७० बनाइदिन माग गरेको संघले जानकारी दिएको छ ।
जिल्लामा ६३ प्रतिशत दुग्ध उत्पादक किसान रहेका छन् । ६८ हजार ६११ दूधालु गाईभैँसी रहेका छन् । जसबाट दैनिक तीन लाख ५० हजार लिटर दूध उत्पादन हुँदै आएको सघंको भनाइ छ । त्यस्तै जिल्लामा उत्पादन भएका ५५ प्रतिशत दूध काठमाडौँ, भक्तपुर, ललितपुर, मकवानपुर र कास्की लगायतका जिल्लामा आपूर्ति हुँदै आएको सघंले जनाएको छ । सघंका अनुसार हाल ढुटो, मकै, पिना, दाना, चोक्कर जस्ता उपभोग्य वस्तुको मूल्य २० देखि ३० प्रतिशतले बढेको हुँदा किसान मर्कामा पर्दै गएका छन् ।
यसरी उपभोग्य वस्तुको मूल्य बढ्दा किसानले घाटा बेर्होनु परेकोले सरकारलाई दूधको मूल्य वृद्धि गर्न माग गरिएको सघंको भनाइ छ ।’ त्यस्तै संघले दूधको मूल्य वृद्धि सँगसँगै कच्चा पदार्थको मूल्य बृद्धिलाई तुरुन्तै घटाउन तथा बैँक तथा बित्तीय संस्थाहरुलाई ऋण असुलीमा धरपकड नगर्न माग गरेको छ ।
तीन वर्षदेखि दुधको मुल्यमा वृद्धि नभएको वताउदै सघंले ३ वर्षको बीचमा दाना चोकरको मुल्य झण्डै दुईगुनाको दरले वृद्धि भएको जानकारी दिएको छ ।सघंका अनुसार आज भन्दा तीन वर्षअघि प्रति केजी २२ रुपैयाँ र दाना २५ रुपैयाँ थियो ।
हाल चोकरर दाना दुबैको मुल्य ४० रुपैयाँ प्रति केजी पुगेको छ । १५ हजारमा पाइने एक ट्याक्टर परालको मुल्य अहिले २५ हजार रुपैयाँ बढि पर्छ । उपभोग्य वस्तुमा १० देखि १५ प्रतिशत मुल्य वुद्धि भएको छ । पशुपालन गर्दा अवश्यक पर्ने हरेक चिजको लागत बढ्दो क्रममा भएपनि दूधको मुल्य उहि नै रहँदा किसानहरु व्यवसायबाट पलायन हुनुपर्ने अवस्था सृजना भएको सघंको गुनासो छ ।
चितवनलाई नेपाल सरकारले तीन वर्ष अगाडि दूधमा आत्मनिर्भर क्षेत्र घोषणा गरेको थियो ।
चितवनमा आइतबार भएको सो पत्रकार सम्मेलनमा बागमती प्रदेशका कृषि तथा पशुपन्छी विकास मन्त्री केशब पोख्रेल ,सहकारी संघका अध्यक्ष किशोर वगाले , संघका कोषाध्यक्ष बालकृष्ण उप्रेती लगायतको उपस्थिती रहेको थियो ।
