काठमाडौँ : शहीद स्मारक ए डिभिजन लिगको १० औँ चरणका खेल शुक्रबारबाट सुरु हुँदैछ । अखिल नेपाल फुटबल संघ ९एन्फा० को आयोजनामा भइरहेको प्रतियोगिताको दशौँ चरण शुक्रबारबाट हुने भएको हो ।
यसअघि, नवौँ चरणमा एक खेल बाँकी राख्दै एन्फाले लिगलाई विश्राम दिएको थियो । राष्ट्रिय टोलीले पहिलोे अफ्रिकन प्रतिद्वन्दी मौरिससविरुद्ध दुई मैत्रीपूर्ण खेल खेलेको थियो ।
यस चरणमा कुल सात खेल हुने छन् । एक खेल सातदोबाटोस्थित एन्फा मुख्यालयको मैदानमा र ६ खेल त्रिपुरेश्वरस्थित दशरथ रंगशालामा हुने जनाइएको छ । यो चरण तीन दिनको हुनेछ ।
पहिलो खेलमा रेलिगेसन जोनमा रहेको फ्रेन्डसले ब्रिगेड ब्वाइज क्लबको सामना गर्नेछ । त्यस्तै दोस्रो खेलमा त्रिभुवन आर्मी फुटबल क्लबले जावलाखेल युथ क्लबको चुनौती पेस गर्नेछ । खेल दशरथ रंगशालामा क्रमशः १ बजे र साँझ पौने ५ बजे सुरु हुनेछ ।
त्यस्तै शनिबार तीन खेल हुने छन् । एक खेल एन्फामा हुँदा दुई खेल दशरथ रंगशालामा हुनेछ ।
नेपाल पुलिस क्लब र सातदोबाटो एन्फामा १ बजे भिड्दा लिग लिडर मछिन्द्र फुटबल क्लबले सोही समयमा च्यासल युथ क्लबको दशरथ रंगशालामा सामना गर्नेछ । साँझ पौने ५ बजे त्रिपुरेश्वरमै हुने खेलमा मनाङ मस्र्याङ्दी क्लब र थ्रीस्टार क्लबबीच प्रतिस्पर्धा हुनेछ ।
यस्तै दशैँ चरणको अन्तिम दिन तथा आइतबार दुई खेल हुने छन् । दिउँसो न्युरोड टिम एनआरटीले हिमालयन शेर्पा क्लबको सामना गर्नेछ । यस्तै साँझ पौने ५ बजे हुने खेलमा एपीएफ फुटबल क्लब र संकटा क्लबबीच प्रतिस्पर्धा हुनेछ ।
लिगमा २३ अंकसहित मछिन्द्र शीर्ष स्थानमा छ । १९ अंकको मनाङ दोस्रो स्थानमा रहँदा आर्मी १७ अंकसहित तेस्रो स्थानमा छ । यस्तै थ्रीस्टारको १६, संकटा १४, एनआरटी १३, सातदोबाटो १२, हिमालयन ११, एपीएफ १०, पुलिस १०, जावलाखेल ८, बीबीसी ६, च्यासल ५ र फ्रेन्ड्स ३ अंकसहित क्रमशः चौथो देखि १४ औँ स्थानमा छन् ।
