काठमाडौँ, फागुन २३- नेपाल गुणस्तर तथा नापतौल कार्यालय काठमाडौँले अनियमित नापतौल यन्त्र प्रयोग गरी उपभोक्ताहरूलाई ठग्ने र समयमा नापतौल यन्त्रको नवीकरण नगर्ने चार हजार सात सय ४१ जना व्यापारीलाई कारबाही गरेको छ।

कार्यालयले यस आर्थिक वर्षको छ महिनामा नापतौलमार्फत उपभोक्तालाई ठग्ने तथा समयमा यन्त्रको नवीकरण नगर्ने व्यापारीहरूलाई कारबाही र जरिवाना गरेको हो।

कार्यालय प्रमुख राकेशकुमार झाका अनुसार अनियमित नापतौल र नाप्ने तौलने यन्त्र प्रयोग गरी आम उपभोक्ताहरूलाई ठग्ने क्रम बढेकाले कार्यालयले विशेष निगरानी बढाएको छ। उहाँले भन्नुभयो, “अनुगमनका क्रममा केही व्यापारीहरूले यन्त्रको दर्ता नगराएको र दर्ता गरेकाहरूले पनि नवीकरण नगरेको पाइयो, त्यस्तालाई हामीले कारबाहीको दायरामा ल्याएका छौं।”

पछिल्लो समय व्यापारीहरूको सहजताका लागि कार्यालयले ‘डोर टु डोर’ अभियान पनि सञ्चालन गरिरहेको छ। अभियानअन्तर्गत नयाँ व्यापारीलाई अनुमति प्रदान गर्ने, अनियमित गर्नेलाई कारबाही गर्ने, जाँच नवीकरण गर्नेलगायत काम भइरहेको कार्यालय प्रमुख झाले बताउनुभयो।

साउनदेखि पुस मसान्तसम्म कार्यालयले एक हजार तीन सय ८२ व्यापारीलाई नापतौल तथा नाप्ने तौलने यन्त्र प्रयोग गर्न अनुमति प्रदान गरेको छ। यसैगरी, चार हजार ३३ नापतौल तथा नाप्ने तौलने यन्त्रको जाँच, एक सय दुई पेट्रोल पम्प जाँच र दुई हजार ६ सय १८ ट्याक्सी मिटर जाँच गरिएको छ।

सीमित स्रोत र साधनकाबीच पनि बजार अनुगमनलाई तीव्रता दिइएको छ। उपभोक्ताको हित संरक्षणका लागि कार्यालयले ८० पटक एकल अनुगमन र ५२ पटक संयुक्तरूपमा बजार अनुगमन गरेको छ।

जानीजानी सेवाग्राहीलाई ठग्ने क्रम बढेकाले कारबाहीलाई प्राथमिकता दिइएको कार्यालय प्रमुख झाले बताउनुभयो। उहाँले भन्नुभयो, “नियतवश आम उपभोक्तालाई ठग्ने जोकोहीलाई कारबाहीको दायरामा ल्याउँछौं।”

कार्यालयले यस आवको छ महिनामा रु ९२ लाख ९८ हजार ५ सय ९२ राजस्व संकलन गरेको छ। हाल काठमाडौँ, भक्तपुर, ललितपुर, काभ्रेपलाञ्चोक, सिन्धुपाल्चोक, दोलखा, धादिङ, नुवाकोट र रसुवा गरी नौवटा जिल्लामा नापतौलको अनुमति प्रदान, नवीकरण, अनुगमन र गल्ती गर्नेलाई कारबाही गर्दै आइरहेको छ।