गैँडाकोट// गैँडाकोट नगरपालिका वडा नं. ४ ले यातायात सुरक्षा र व्यवस्थापनलाई प्राथमिकतामा राखेर वडा भित्रका विभिन्न चोक हरुमा ट्राफिक संकेत चिन्ह सहितको डिभाइडर ड्रम राखिएको छ ।

पछिल्लो समय बढ्दो दुर्घटनाको जोखीम न्यूनिकरण गर्ने उद्देश्यले वडा भित्रका विभिन्न चोक हरुमा ट्राफिक संकेत सहितको ड्रमहरु राखिएको गैँडाकोट नगरपालिका वडा नम्बर ४ का वडा अध्यक्ष तेजप्रसाद घिमिरेले जानकारी दिनुभयो । आज बुधबार वडा भित्रका १२ वटा चोकमा डिभाइडर ड्रम राखिएको बताउँदै  घिमिरेले आगामी दिनमा जेब्रा क्रस निर्माण, ट्राफिक संकेत सहित होडिङ बोर्डहरु राखिने बताउनुभयो । उहाँले सवारी चालक र पैदलयात्रीहरूलाई यी डिभाइडर ड्रम र ट्राफिक संकेत चिन्हको पालना गर्न आग्रह गर्नुभयो।

ईलाका ट्राफिक प्रहरी पोष्ट गैँडाकोटका प्रमुख प्रहरी नायब निरीक्षक दामोदर मल्लले दुर्घटना न्युनिकरणका लागि सबैको भूमिका महत्वपूर्ण हुने बताउदै सबैलाई ट्राफिक नियमको पालना गर्न अनुरोध गर्नु भयो ।

स्थानीय समुदाय, जनप्रतिनिधि, टोल विकास संस्था र समाजसेवीहरूको उपस्थितिमा आयोजित कार्यक्रममा वडा सदस्य हरि पौडेलले उद्घाटन कार्यक्रमको सहजीकरण गर्नुभएको थियो।

गैँडाकोट  ४ को यो पहल यातायात सुरक्षा र व्यवस्थापनको अभिन्न अङ्गको रूपमा स्थापित भएको छ। यसले स्थानीय सरकारलाई यस क्षेत्रमा आफ्नो महत्वपूर्ण भूमिका देखाउँछ। स्थानीय समुदाय र विभिन्न निकायसँगको समन्वयमा सञ्चालित यस्तो नवीन अभियानले निश्चय नै अन्य स्थानीय तहका लागि अनुकरणीय नमुना प्रस्तुत गर्नेछ। यसले दुर्घटना न्यूनीकरणमा मात्र सहयोग गर्नेछैन, सुरक्षित र सुव्यवस्थित यातायात प्रणालीको विकासमा समेत टेवा पुर्याउनेछ।