गैँडाकोट नगरपालिका वडा नम्बर ३ ढोडेनीस्थित तुलबहादुर सुनारीको घरमा गएराति करिब सवा २ बजे आगलागी भएको छ। उक्त घटनामा सुनारीको घर र गोठ पूर्णरूपमा जलेर नष्ट भएको छ।

स्थानीय, प्रहरी, जेसिबी र भरतपुर महानगरपालिकाबाट आएका दुईवटा दमकलको सहयोगमा बिहान साढे ५ बजेतिर मात्र आगो नियन्त्रणमा लिन सफल भएको थियो। समयमै दमकल आएको र स्थानीयको सहयोगले अन्य क्षति हुन नपाएको वडा अध्यक्ष शिवकान्त तिवारीले जानकारी दिनुभयो।

आगलागीबाट सुनारी परिवारको दुई तले कच्ची घर, सम्पूर्ण सामग्री, केही नगद रकम, गोठमा रहेका कुखुरा, हाँस र खरायो समेत जलेको प्रारम्भिक विवरण आएको छ। आगो लाग्नुको कारण अझै पत्ता लागेको छैन। क्षतिको विस्तृत विवरण संकलन भैरहेको इलाका प्रहरी कार्यालय गैँडाकोटले जनाएको छ।

कालिगण्डकी करिडोर निर्माण भएसँगै सडक सहज भएकोले पनि समयमै दमकल पुग्न सकेको बताइएको छ। वडा अध्यक्ष तिवारीले आगलागीबाट जोगिएका घरहरूबाट स्थानीयले सामान घर बाहिर निकाल्नुपरेको जानकारी दिनुभएको छ।

यस घटनामा कुनै मानवीय क्षति नभएको र सुनारी परिवारलाई स्थानीय तथा सरकारी निकायबाट राहत प्रदान गरिने आशा गरिएको छ।