काठमाडौँ : आसन्न स्थानीय तहकोे चुनावमा काठमाडौँ महानगरपालिका मात्रै हैन, देशका ७५३ वटै स्थानीय तहमा उम्मेदवारहरू घर-दैलोमा व्यस्त छन् । देशको राजधानी काठमाडौँमा कुन उम्मेदवारले बाजी मार्छ भनेर चासोको रूपमा हेरिएको छ ।

महानगरको मेयर पदमा गठबन्धनको तर्फबाट सिर्जना सिंह र एमालेका तर्फबाट केशव स्थापितले उम्मेदवारी दिएका छन् ।

स्थानीय चुनावमा महानगरको मेयर पदका लागि स्वतन्त्र उम्मेदवारी दिएका बालेन शाहको पनि कम चर्चा छैन । देशभरका युवाहरूले समर्थन गरेका छन् भने गत निर्वाचनमा महानगरको उम्मेदवार भएकी रन्जु दर्शनाको चुनावी अभियानका सहभागी भएका अभियन्ताहरुले समेत बालेनलाई साथ दिएका छन् ।

आसन्न स्थानीय चुनावमा विवेकशील साझा पार्टीको तर्फबाट समीक्षा बास्कोटाले उम्मेदवारी दिएकी छिन् । तर उनको उम्मेदवारीसँग उनकै पार्टीका सदस्यहरूले सहमत जनाएका छैनन् । पार्टीका एक जना संयोजकले एकलौटी रूपमा महानगरको मेयरको उम्मेदवार छनोट गरेको भन्दै विरोध नै जनाएका थिए ।

विवेकशील साझा पार्टीका केन्द्रीय सदस्यहरू नै काठमाडौँ महानगरपालिकाका स्वतन्त्र उम्मेदवार बालेनको अभियानमा सक्रिय भएर लागेका छन् । गत निर्वाचनमा महानगरको मेयरको उम्मेदवारी दिएकी रन्जु दर्शनाको चुनावी अभियानका अभियन्ताहरु नै बालेनको चुनावी अभियानमा लागेका हुन् ।

विवेकशील साझाका केन्द्रीय सदस्यहरूले अध्यक्ष रविन्द्र मिश्रले एकल रूपमा महानगरको उम्मेदवार छनोट गरेकाले मिलन पाण्डे पक्ष र पार्टी भित्र नै रहेको अर्को असन्तुष्ट पक्षले असहमति जनाएको थियो ।

विवेकशील नेपाली दल र साझा पार्टी पुनः एकीकरण हुनु पहिले विवेकशीलका तर्फबाट महानगरको २७ वटा वडाहरूमा वडा कमिटी नै बनाएको थियो । तर पार्टी एकीकरण हुँदा ती वडा कमिटीहरू भङ्ग गरिएको एक नेताले बताए । उनका अनुसार पटक-पटक महानगर र वडा कमिटी बनाउन आह्वान गरे पनि काम हुन सकेको छैन ।

विवेकशील साझा पार्टीले आसन्न स्थानीय चुनावमा महानगरको मेयर र तीन वटा वडामा वडाअध्यक्ष मात्रै उठाएको छ ।

विवेकशील साझा पार्टीका संयोजक पाण्डेले काठमाडौँ महानगरपालिका भन्दा अन्य पालिकामा स्वतन्त्र र विवेकशील साझा पार्टी कै उम्मेदवारहरूलाई समर्थन गर्दै आएका छन् । तर उनले काठमाडौँ महानगरमा भने कसैलाई समर्थन गरेको देखिँदैन ।

विवेकशील साझा पार्टीका सङ्गठन विभाग प्रमुख निर्देश सिलवाल पनि महानगरको मेयरको उम्मेदवारलाई खुलेर सहयोग गरेको देखिदैंन । सिलवालले केही दिन पहिले स्वतन्त्र उम्मेदवार बालेनलाई भेटेको फोटो सामाजिक सञ्जालमा पोस्ट गरेका थिए ।

विवेकशील साझा पार्टीको तर्फबाट प्रदेश सदस्य बनेका बिराजभक्त श्रेष्ठ पनि बास्कोटाको पक्षमा खुलेर लागेका छैनन् । श्रेष्ठ काठमाडौँकै स्थायी बासिन्दा हुन्। विवेकशील साझाका संयोजक मिलन पाण्डेले पनि कता सहयोग गर्ने भनेर खुलेका छैनन् ।

‘काठमाडौँ महानगर बाहिरको उम्मेदवारहरूलाई प्रत्यक्ष रूपमा सहयोग गर्दै आएको छु । तर काठमाडौँमा भने कसलाई समर्थन गर्ने भनेर साथीभाइसँग छलफल गर्दै छु’ पाण्डेले इकागजसँग भने ।

गत स्थानीय चुनावमा काठमाडौँ महानगरपालिकामा कुल २ लाख ८१ हजार १०४ जना मतदाता थिए । जसको ७० प्रतिशत अर्थात् १ लाख ९७ हजार २२७ मत खसेको थियो । उक्त मतदानमा खसेको मतको १५ प्रतिशत मत बदर भएको थियो भने ६.१८ प्रतिशत मत बदर भएको निर्वाचन आयोगले जनाएको छ ।

२०७४ सालमा भएको स्थानीय चुनावमा ६४ हजार ९१३ मत ल्याएर नेकपा एमालेका विद्यासुन्दर शाक्यले काठमाडौँ महानगरपालिकाको मेयरमा निर्वाचित भएका थिए । यस्तै नेपाली काँग्रेसका राजु राज जोशीले ४५ हजार २६९ मत ल्याएर दोस्रो भएका थिए ।

उक्त चुनावमा १५ जना स्वतन्त्र उम्मेदवारले महानगरमा मेयरका लागि उम्मेदवारी दिएका थिए ।

उक्त स्थानीय चुनावमा तत्कालीन विवेकशील नेपाली दलका तर्फबाट मेयरको पदमा उम्मेदवारी दिएकी रन्जु दर्शनाले २३ हजार मत ल्याएकी थिइन् । वैकल्पिक राजनीतिको नेतृत्व गर्दै पूर्वसचिव किशोर थापाले पनि उम्मेदवारी दिएका थिए । उनले गत स्थानीय चुनावमा १८ हजार ४९६ मल ल्याएका थिए ।

त्यसैले आसन्न स्थानीय चुनावमा विवेकशील साझाका नेताहरूले कता समर्थन गर्छन् भनेर चासोको रूपमा हेरिएको छ ।