चितवन, १९ वैशाख । चितवनको भरतपुरलाई पहाडीकी रानीको उपनामले चिनिने तनहुँको बन्दीपुरसँग जोड्न रोयल इन्फिल्डका चालकहरु दुई दिने यात्रामा निस्किएका छन् ।

भरतपुरको सन अटो मोबाइल्स र टाँडीको यति अटो मोबाइल्सको संयुक्त आयोजनामा आज एक सय जना रोयल इन्फिल्डका चालकहरु यात्रामा निस्किएका हुन् । चालकहरु यात्रामा निस्किनु अगाडि नेपालका लागि रोयल इन्फिल्ड बाइकको आधिकारिक बिक्रेता अल्फा अटोमोटिभ प्रालिका निर्देशक मेघराज पौडेलले आफ्ना राइडर्सहरुले रमाइलोको लागि मात्रै यात्रा गर्नेभन्दा पनि सडक सुरक्षा र ट्राफिक नियम पालना गर्ने सन्देश दिने गरेको बताउनुभयो ।

एक स्थानबाट अर्को स्थानमा राइडर्सहरु जाँदा आन्तरिक पर्यटनको प्रवद्र्धनसमेत हुने भन्दै पौडेलले यो देश र समाजप्रतिको योगदान भएको बताउनुभयो । नेपालभरी रहेका शोरुमबाट नियमित राइड गरिरहेको भन्दै उहाँले आफ्ना उपभोक्ताहरुको सक्रिय सहभागिता रहने गरेको बताउनुभयो । राइडर्सहरुलाई आकर्षित गर्नेगरी सबै ठाउँमा एकैप्रकारको शोरुम निर्माण गरिएको उहाँको भनाइ छ ।

कार्यक्रममा सन अटोमोबाइल्सका सेल्स म्यानेजर नवराज अधिकारीले भरतपुरदेखि बन्दीपुरसम्म दुई दिनका लागि यात्रा सुरु भएको बताउनुभयो । टाँडी र भरतपुरको शोरुमबाट एक रात बस्नेगरी हिँडेको टोली बन्दीपुर घुमेर त्यहाँ बास बसी शनिबार भरतपुर फिर्ता आउने अधिकारीले बताउनुभयो । नजिकै र एडभान्चर यात्रा हुने भएकाले राइडरहरुको मागअनुसार बन्दीपुर रोजिएको उहाँको भनाइ थियो ।