चितवन, पुस २२-

भरतपुर महानगरपालिकाले ९ करोड ३ लाख रुपैयाँको पूरक बजेट ल्याएको छ ।  आइतबार १४ औं नगर सभाको बैठकमार्फत पूरक बजेट ल्याएको हो ।

महानगरले आर्थिक वर्ष २०८०\०८१ का लागि ६ अर्ब ३९ करोड ७९ लाख ९० हजार बजेट बिनियोजन गरेको थियो । जसमध्ये चालूतर्फ विनियोजित २ अर्ब ६७ करोड १४ लाख ८४ हजार हजारमा पुस मसान्तसम्ममा ७९ करोड १ लाख १९ हजार(३० प्रतिशत) खर्च भएको छ।

पूँजिगत खर्चतर्फ बिनियोजित तीन अर्ब ७२ करोड ६५ लाख ६ हजार रुपैयाँमा पुस मसान्तसम्म ४६ करोड ७७ लाख (१३ प्रतिशत) खर्च भएको छ । महानगरले यस वर्ष एक अर्व ७५ करोड रुपैयाँ आन्तरिक आम्दानी प्रक्षेपण गरेकोमा पुस १८ गतेसम्म ५३ करोड तीन लाख अर्थात् ३१ प्रतिशत संकलन भएको छ ।

आर्थिक वर्ष २०७९\८० बाट आ.व. २०८०\८१ मा रु एक अर्ब २६ करोड ४४ लाख सञ्चितकोषमा रहेको छ । आर्थिक वर्ष ८०\८१ मा भुक्तानी दिन बाँकी तथा क्रमागत एवम् अधुरो योजना समेतको लागि एकमुष्ट एक अर्ब ६५ करोड आर्थिक वर्ष २०७९\८० मा बैंक मौज्दात रहेको रकमबाट खर्च हुने प्रक्षेपण गरिएको थियो तर आव. २०८०\८१ मा वास्तविक भुक्तानी दिन बाँकी एवम् क्रमागत तथा अधुरो योजना सम्पन्न गर्न एक अर्ब २४ करोड ४४ लाख देखिएकोले दुई करोड भुक्तानी बाँकी तथा क्रमागत योजना बजेट उपशीर्षकमा मौज्दात रहने देखिन्छ । साथै भरतपुर महानगरपालिकाको मर्मत सम्भार कोष खातामा बैँक मौज्दात रकम पाँच करोड एवम् शहरी गरिब सहयोग कोष तथा खातामा रहेको जम्मा रकम ७० लाख, समयमा कार्य सम्पन्न नगरी धरौटी जफत गरी प्राप्त भएको जम्मा ४२ लाख, महानगरपालिकाको अन्य खाता फ्रिज ८८ लाख गरी जम्मा ९ करोड आर्थिक वर्ष २०८०\८१ को लागि पूरक बजेट रहेको महानगर मेयर रेनु दाहालले बताइन् ।

पुरक बजेटबाट समपुरक साझेदारी कोषका लागि विद्युत् प्राधिकरणसँग स्मार्ट लाइट साझेदारी कार्यक्रम दुई करोड ६७ लाख, डीपीआर तथा पूँजिगत परामर्श एवम् इआईएसमेत नपुग ३५ लाख, रोड मार्किङ तथा क्याट आई एवम् शहरी सौन्द्रयकरण ४० लाख, चोक सुधार कार्यक्रम थप १५ लाख, मानव सेवा आश्रम पूर्वाधार निर्माण ३५ लाख, दुध अनुदान नपुग थप ४५ लाख, कक्षा १–८ का दलित विद्यार्थी छात्रवृत्ति कार्यक्रम ३६ लाख, समपूरक साझेदारी दुई करोड, मागमा आधारित विभिन्न योजनाहरु दुई करोड, वडा नं १८ को विविध खर्च फ्रिज ६ लाख, ओपन जिम सामग्री खरिद १० लाख, बालमैत्री वडा घोषणा कार्यक्रम नपुग थप ६ लाख, वडा नं १७ मा पूँजीगत कार्यक्रम चालु उपशीर्षकमा रहेको हुँदा पूजीगत कार्यक्रमको लागि स्रोत व्यवस्थापन ६ लाख रुपैयाँ विनियोजन गरिएको छ ।

नगर सभालाई सम्बोधन गर्दै महानगरकी मेयर दाहालले महानगरको विकासमा दीर्घकालीन महत्व राख्ने आयोजनाहरू महानगरीय रिङ रोड र लिंक रोड सञ्जाल बिस्तार, अन्तर्राष्ट्रिय स्तरको सिटी हल, पुल्चोक गोन्द्राङ ६ लेनको सडक, बाइपास रोड र हुलाकी मार्ग बिस्तार, शारदानगर, जखडीमाई, दिव्यनगर, पार्वतीपुर, मेघौली, धनगढा र चौकीडाँडा खानेपानी आयोजनालगायतका महत्वपूर्ण पूर्वाधार विकासका आयोजनाहरूमध्ये केही सम्पन्न भइसकेका छन् भने केही सम्पन्न हुने चरणमा रहेका बताइन् । यसका अतिरिक्त नारायणी तटलाई सीबिच मोडलमा विकास, नारायणी नदीको तटबन्ध, नारायणी नदी नियन्त्रण आयोजना, भरतपुर विमानस्थलको विस्तार तथा मेघौली विमानस्थलको स्तरोन्नति, नारायणी नदीमा सिग्नेचर ब्रिज निर्माण, ज्ञानेश्वर सामुदायिक वन परिसरमा ओपन जु तथा वडा नं. ६ मा वन्य जन्तु उद्धार केन्द्र निर्माण जस्ता दूरगामी महत्त्व र बृहत लगानीका आयोजना अगाडि बढिरहेका जानकारी दिइन् । संघ, प्रदेश र हाम्रो लगानीमा महानगरको प्रशासनिक भवनको निर्माण कार्य पनि द्रुत गतिले अगाडि बढिरहेको छ भने नेपाल ट्रष्टको स्वामित्वमा रहेको ऐतिहासिक दियालो बंगलालाई भरतपुर भ्रमण वर्षको सन्दर्भ पारी पर्यटनका लागी अवलोकनका व्यवस्था मिलाइएको उनले बताइन् ।

उपमेयर चित्रसेन अधिकारीले विनियोजन ऐन–२०८० ले चालु आर्थिक वर्षको लागि विभिन्न बजेट खर्च शीर्षक तथा उपशीर्षक अन्तर्गत खर्च गर्न दिएको अख्तियारी रकम पर्याप्त नभएकले पूरक बजेट ल्याउनु परेको बताए । चालू आर्थिक वर्षको लागि विनियोजन ऐनले अख्तियारी नदिएको नयाँ खर्च शीर्षकमा खर्च गर्न आवश्यक भएको, विभिन्न खर्च शीर्षक तथा उपशीर्षकअन्तर्गत नयाँ कार्यक्रम थप एवम् संशोधन गर्नुपरेको उनले बताए ।

बजेट शीर्षक तथा उपशीर्षक अन्तर्गत श्रोत सुनिश्चितता गरी योजना समयमै सम्पन्न गर्न, आर्थिक, भौतिक एवम् सामाजिक र वातावरणीय पूर्वाधार विकास गरी समुन्नत र सुदृढ महानगर बनाई राष्ट्रको विकासमा टेवा पु¥याउन,साधन–स्रोत, अवसर र क्षमताको विकास तथा उच्चतम उपयोग गरी समृद्ध महानगर बनाउन, सेवा प्रवाहलाइ सरल तथा प्रभावकारी बनाउन, र वित्त विश्लेषणमार्फत जोखिम न्यूनीकरण गर्ने उद्देश्यले पूरक बजेट ल्याइएको अधिकारीले बताए ।

उज्यालो भरतपुर कार्यक्रम अन्तर्गत स्मार्ट सडक बत्ती, हाई मास्ट एवम् मिनिमास्ट बत्ती गरी ८० किमि सडकमा जडान भइसकेको छ भने नेपाल विद्युत् प्राधिकरणसँगको साझेदारीमा दोस्रो प्याकेजको सम्झौता भई कार्य प्रारम्भ हुने चरणमा रहेको मेयर दाहालले उल्लेख गरिन् ।
‘हरित उर्जाको खपत, पेट्रोलियम पदार्थको बचत’ गर्ने नीति अनुरुप नेपाल विद्युत प्राधिकरणसँगको समन्वयमा थप चार्जिङ स्टेशनका लागि जग्गा व्यवस्थापन गरिएको र महानगरले विद्युतीय सवारी साधन खरिद गर्ने नीति अवलम्बन गर्दै ई–स्कुटर खरिद गर्ने प्रक्रियालाई अगाडि बढाइएको छ । महानगरभित्र विद्युतीय बससहित गुणस्तरीय र सुरक्षित यातायात सेवाको लागि प्रारम्भिक अध्ययन भइरहेको मेयर दाहालले बताइन् ।

जिईएसको प्रयोग गरी भू–उपयोग वर्गीकरण गर्ने कार्यका लागि परामर्शदाता छनौट गरिएको र संघीय सरकारको समन्वयमा भरतपुरका मुख्य सहरी क्षेत्रमा प्रशोधन सहितको ढल निकासको लागी सर्भे तथा डीपीआर भइरहेको जानकारी दिइन् ।