धनगढी,पुस १४-

कैलालीको लम्कीचुहा नगरपालिकास्थित एक सडक कालोपत्र गरेको ६ दिनमै घाँस उम्रिएको छ । निर्माण कम्पनीको बदमासी र नगरपालिकाको बेवास्ताका कारण अघिअघि सडकमा कालोपत्रेको काम हुँदैछ भने पछि कालोपत्र माथि घाँस उम्रिन थालेको हो । लम्की चुहा नगरपालिका ३ स्थित व्यवस्थित नगरमा कालोपत्र गरेको ६ दिनमै घाँस उम्रेपछि कालोपत्रको काम कमसल भएको भन्दै स्थानीयहरु आक्रोशित भएका छन् । घरै अगाडिको सडक कालोपत्र भएपछि स्थानीय हरि भण्डारी खुसी भएका थिए । तर उनको खुसी छ दिनमै निराशामा बदलियो । विकासको नाममा आँखामा छारो हाल्ने काम मात्रै भएको भन्दै भण्डारीले आक्रोश पोखे ।

नयाँ कालोपत्रमा घाँस उम्रेको देखाउँदै भण्डारीले भने, ‘एकातिर कालोपत्र गर्दैछ, अर्कोतिर घाँस उम्रिरहेको छ । यो अवस्थाले कालोपत्र नै उप्किने होला । यस्तो कालोपत्र कति दिन नै टिक्ने होला १ आँखामा छारो हाल्ने काम मात्रै भयो ।’ त्यस्तै अर्का स्थानीय खगेन्द्र प्रसाद बजगाईँले नयाँ कालोपत्र सडकमा घाँस उम्रेपछि र केही ठाउँमा बेसो ग्राबेल नै निस्कन थालेपछि ठेकेदार, जनप्रतिनिधिलाई जानकारी गराएको तर कसैले सुनुवाइ नगरेको बताए ।

डेढ वर्षअघि लम्की चुहा नगरपालिकाका र सुलभ एण्ड सुस्मिता कन्ट्रक्सनबिच ६० लाखमा १२ सय मिटर सडक कालोपत्रको लागि ठेक्का सम्झौता भएको थियो । काम समेत समयमा पुरा नगरेको ठेकेदारले ढिला गरेको काममा पनि बदमासी गरेको स्थानीयको भनाइ छ । नगरपालिका ३ का वडाध्यक्ष तथा नगर प्रवक्ता लव बहादुर शाहीले गरिएको कालोपत्र आफूले केही दिनअघि मात्रै अनुगमन गरेको बताए । त्यसैबेला मापदण्ड अनुसार नै काम गर्न निर्माण कम्पनीलाई भनेको बताए । तर कालोपत्रमाथि घाँस आएको जानकारी पाएपछि ठेकेदारलाई तत्काल काम रोक्न भनेको उनले बताए ।