गैँडाकोट : यस पटको स्थानीय तहको निर्वाचनमा मतदातामा मतदाता शिक्षाको कमि देखियो । दलहरुबीच गठबन्धन भएका कारण मतदातालाई भोट हाल्ने सवालमा अप्ठेरो देखियो । गैँडाकोटमा गठबन्धनमा रहेका दलहरुले मतदाता शिक्षामा कम ध्यान दिँदा मतदाताले उम्मेद्वार नभएका ठाउँमा मत खसालेका छन् ।
गैँडाकोटमा नेकपा एमाले र राप्रपाबीच गठबन्धन रहेको थियो । गठबन्धनमा रहेका दलका कार्यकर्तामा मतदाता शिक्षाको कमि हुँदा उम्मेद्वार नभएको स्थानमा भोट खसालेको पाइएको छ । नेकपा एमालेको मेयरमा उम्मेद्वारी थियो भने उपमेयरमा राप्रपाको उम्मेद्वारी थियो ।
गैँडाकोटमा उपमेयरमा सूर्य चिन्हमा उम्मेद्वार नै नभएको स्थानमा नेकपा एमालेका २ हजार ८ सय ६७ जनाले मत खसालेका छन् । सबैभन्दा धेरै मत गैँडाकोट मा १२ खसेको छ । गैँडाकोट १२ मा ४ सय ३७, गैँडाकोट ११ मा ३ सय ६१, गैँडाकोट ६ मा २ सय ७०, गैँडाकोट ५ मा २ सय ६३ मत खसेको छ । सबैभन्दा कम मत गैँडाकोट १५ मा २८ मत सूर्य चिन्हमा खसेको छ । जुन मतको कुनै अर्थ रहँदैन । गठबन्धनमा रहेको एमालेले हलो चिन्हमा मतदान गर्नुपर्नेमा एकै लाइनमा मतदान गरेको पाइएको छ । दुई पानामा चिन्ह हुँदा खोज्नु पर्ने र झण्झट भएकाले लस्करै मतदान गरेको देखिन्छ ।
एमाले र राष्ट्रिय प्रजातन्त्र पार्टीका गठबन्धनका उम्मेद्वार तुलाराम पौडेलले ८ हजार ६ सय ४० मत मात्र प्राप्त गर्नुभयो ।
गैँडाकोट नगरप्रमुख पदमा राप्रपाको पनि उम्मेद्वारी थिएन । नगरप्रमुख पदका लागि हलो चिन्हमा पनि ९६ मत खसेको छ ।
नेकपा माओवादी केन्द्रको पनि प्रमुख र उपप्रमुख दुबैमा उम्मेद्वारी थिएन । प्रमुखको हँसिया हथौडामा कुल ७१ मत र उपप्रमुखमा १४२ मत खसेको छ ।
नेपाली काँग्रेसको पनि उम्मेद्वार नभएका सदस्य पदहरुमा मत खसेको छ ।
सधैँ एकै लाइनमा मतदान गर्दै आएका अधिकांश मतदाताहरु यस पटक गठबन्धनका कारण फरक चिन्हमा मतदान गर्नुपर्ने बाध्यताका कारण अलमलमा परेको देखिन्छ । कतिपय मतदातालाई कुन पदमा उम्मेद्वार छ छैन थाहा नभएका कारण पनि उम्मेद्वार नभएका स्थानमा मत खसेको देखिन्छ । यस्तो मत गणना भएपनि जुन मतको कुनै अर्थ भने रहँदैन ।
नगर प्रमुख उपप्रमुख पदका लागि भएको मतदानमा ३ सय ५६ मत बदर भएको छ । सबैभन्दा धेरै बदर हुने वडामा गैँडाकोट २ रहेको छ । गैँडाकोट २ मा ४२ मत बदर भएको छ । दोस्रोमा गैँडाकोट १ जहाँ ३५ मत बदर भएको छ । तेस्रोमा गैँडाकोट १८ जहाँ ३४ मत बदर भएको छ ।
