भरतपुर । पाचौं स्वर्गीय गणेशबहादुर स्मृति जिल्ला स्तरीय खुल्ला नकआउट फुटबलको उपाधि जु एफसी भरतपुर २९ जुगेडीले जितेको छ । आज (आइतबार) सम्पन्न फाइनलमा टाईगर युवा क्लबलाई ३-० ले पाखा लगाउदै जुगेडी च्याम्पियन बनेको हो । जुगेडीको जितमा अनुज भण्डारी, रन्जन पुन र पदम भट्टराईले एक-एक गोल गरे ।
भरतपुर ११ कैलाश टोलस्थित युनिक क्लबको मैदानमा भएको फाइनलमा तिनै गोल पहिलो हाफमा भएको थियो । खेलको २६ औं मिनेटमा अनुजको गोलबाट जुगेडीले खेलमा अग्रता लियो । ३३ औं मिनेटमा रन्जनले अग्रता दोब्बर बनाए ।३७ औं मिनेटमा पदमले गोल गरेपछि जुगेडी ३-० ले विजयी भयो । जुगेडीका सुमित श्रेष्ठ म्यान अफ दि म्याच भए ।
विजेता जुगेडीले एक लाख २० हजार रुपैयाँ प्राप्त गरेको छ । उपविजेता टाईगर क्लबले ६० हजार प्राप्त गरेको प्रतियोगिता संयोजक निर्मल अंगाईले जानकारी दिए । टाईगरका रोजल दाहाल प्रतियोगिताभरको उत्कृष्ट खेलाडी घोषित भए । उनले नगद पाँच हजार प्राप्त गरे । जुगेडीका शंकर राई उत्कृष्ट डिफेन्डर, जुगेडीकै रोशन मगर उत्कृष्ट गोलरक्षक, अनुज भण्डारी उत्कृष्ट स्ट्राईकर, नारायणी मोटर्स युनिक क्लबका सुजन बराम उदयमान खेलाडी, जुगेडीका सुमित श्रेष्ठ सर्वाधिक गोलकर्ता बने ।
उनीहरुले नगद तीन-तीन हजारसहित शिल्ड र मेडल प्राप्त गरे । युनिक क्लबको आयोजनामा भएको प्रतियोगितामा चितवन, नवलपुर र मकवानपुरका १६ टोली सहभागी थिए ।
