केजीएफ च्याप्टर २ को चौतर्फी वाहवाही छ । फिल्मले संसारभरबाट पहिलै दिन १ सय ३५ करोडको व्यापार गरेको छ । फिल्मका कलाकारको मात्र होइन, प्राविधिकहरूको पनि धेरैले तारिफ गरेका छन् । खासगरी फिल्मको सम्पादन धेरैले मन पराएका छन् । र, यसकाे श्रेय जान्छ, भारत कर्नाटकका २० वर्षे उज्ज्वल कुलकणीलाई ।

केजीएफ २ फिल्मकाे सफलतापछि कलाकारसँगै सम्पादक उज्ज्वल पनि यतिबेला चर्चामा छन् । पहिला उनी युट्युबका लागि टेलिफिल्महरू सम्पादन गर्थे । फिल्म एडिटिङबारे उनले भारतीय मिडियामा भनेका छन्, ‘म यश सरकाे प्रशंसक हुँ । कहिलेकाहीँ म उहाँलाई भेट्न जान्थेँ । केजीएफ १ बाट म प्रभावित थिएँ । त्याे बेला म पीयूसीमा पढिरहेकाे थिएँ । मेरा ठूल्दाइ विनयले मलाई सिनेमा जगतमा आउन सुझाव दिएका थिए ।’ उज्ज्वलले आफूलाई फिल्म सम्पादनमा रूचि भएकैले याे विधा चुनेकाे बताए ।

यसरी मिल्याे केजीएफमा काम

लिखिता रेड्डी केजीएफ २ का निर्देशक प्रशान्त नीलकी श्रीमती हुन् । उज्ज्वलले सम्पादन गरेका केही टेलिफिल्म लिखिताले युट्युबमा हेरेकी थिइन् । र, ती भिडियाेहरू प्रशान्तलाई देखाइन् । उज्ज्वलकाे कलाले प्रशान्तकाे पनि ध्यान खिच्याे । त्याे बेला उज्ज्वल १७ वर्षका थिए ।

उज्ज्वल ब्लकबस्टर फिल्मकाे फ्यान एडिटिङ पनि गर्थे । उनी फिल्मकाे आफ्नाे ‘कट’ आफैँ बनाउँथे । उज्ज्वलले केजीएफ २ का लागि यस्तै एक सम्पादन गरे । प्रशान्तले उज्ज्वलकाे काम मन पराए । अनि केजीएफ च्याप्टर २ का लागि टीजर कट बनाउन उज्ज्वललाई टिममा लिए ।

केजीएफका यशको संघर्ष, हिरो बन्न गाउँबाट भागेर बेङ्लुरु पुगे, गोजीमा थियो मात्र तीन सय रुपैयाँ

उज्ज्वलले सम्पादन यति राम्राे गरिदिए, प्रशान्तले पूरै फिल्मकाे सम्पादन १७ वर्षे किशाेरकाे हातमा सुम्पिए । आफूलाई निर्देशक प्रशान्तले विश्वास गरेकाे उज्ज्वल बताउँछन् ।

किशाेर सम्पादककाे सटिक कट्सलाई दर्शकले खुबै रूचाएका छन् । केजीएफ च्याप्टर २ जस्ताे फिल्मलाई कुनै टाइमलाइनमा कथाका साथ बनाइन्छ । आमरूपमा सम्पादकहरूका लागि याे निकै कठिन हुने फिल्मका प्राविधिक विश्लेषकहरू बताउँछन् । तर, किशोर अवस्थाका, फिल्ममा करिअर सुरु गर्दै गरेका भए पनि उज्जवलले यसलाई राम्राेसँग सम्हाले ।

उज्ज्वलका अनुसार निर्देशक प्रशान्तकाे सहयाेगबाटै उनले प्रत्येक दृश्यकाे सम्पादन गरेका हुन् । ‘म अहिले २० वर्षकाे भएँ । तीन वर्षसम्म मैले केजीएफ च्याप्टर २ सिनेमाकाे सम्पादनमै काम गरे । प्रशान्त सरले मलाई कुनै दुःख आइपर्न दिनुभएन । याे मेराे भाग्य हाे । उच्च शिक्षा पूरा नगरेका कारण बुवाआमा मसित रिसाएनुभएकाे थियाे । तर अहिले केजीएफ रिलिजसँगै मानिसहरूले मेराे कामकाे प्रशंसा गर्न थालेपछि याे देखेर उहाँहरू पनि खुसी हुनुभएकाे छ ।’

उज्ज्वलको प्रशंसायोग्य सम्पादनलाई देखाउँदै कतिपयले हिन्दी सिनेमाका निर्देशकहरूप्रति कटाक्ष गरेका छन् । दक्षिण भारतीय सिनेमा भएकैले उज्ज्वलले आफ्नो क्षमता देखाउने मौका पाएको उनीहरूको तर्क छ । कसैले चाहिँ क्षमता कुनै उमेर, प्रमाणपत्रका आधारमा नहुने भन्दै उज्ज्वलको प्रशंसा गरिरहेका छन् ।

केजीएफ २ मूलरूपमा कन्नड फिल्म हाे । केजीएफकाे पहिलाे भाग सन् २०१८ मा कन्नड र हिन्दीसमेत कैयाैँ भाषामा रिलिज भएकाे थियाे । फिल्मलाई दर्शकले खुबै मन पराएका थिए । केजीएफ-२ मा सुपरस्टार यशसँगै सञ्जय दत्त, रवीना टन्डन र प्रकाश राज मुख्य भूमिकामा छन् ।