काठमाडौ : एकीकृत समाजवादीका अध्यक्ष माधवकुमार नेपालसहित १४ जना सांसद विरुद्ध एमाले अध्यक्ष केपी शर्मा ओलीले दर्ता गरेको रिट निवेदनमाथि आजदेखि सर्वोच्च अदालतले सुनुवाइ गर्दैछ ।
एमालेबाट अलग हुनु अघि नै नेपालसहितका १४ जना सांसदहरुलाई दलबाट कारवाही गरेको तर सभामुख अग्निप्रसाद सापकोटाले कारवाहीको सूचना जारी नगरेको भनी ओलीले सर्वोच्च अदालतमा रिट दर्ता गर्नुभएको थियो ।
एमालेले यही एजेण्डालाई अघि सारेर प्रतिनिधिसभाको बैठक पनि लगातार अवरुद्ध गरेको थियो ।
एमालेले उनीहरुको पद च्युत भइसकेका कारण गैर सांसदहरु संसद बैठकमा बसेको दावी गरिरहेको छ ।
यही दावी सहित ओलीले रिट दर्ता गर्नुभएको थियो ।
एमालेले नेकपा (एकीकृत समाजवादी) दल दर्ताको प्रक्रियामाथि नै प्रश्न उठाएर निर्वाचन आयोगविरुद्ध समेत मुद्दा दायर गरेको थियो ।
झलनाथ खनाल बाहेकका १४ सांसदलाई कारवाहीको पत्र पठाएकोमा त्यसबारे सभामुख अग्नीप्रसाद सापकोटाले तोकिएको समयमा सूचना टाँस नगरेको एमालेको आरोप छ ।
त्यही अवधिमा निर्वाचन आयोगले जबर्जस्ती अर्को दल दर्ता गरेको ओलीद्धारा दायर गरिएको रिटमा उल्लेख छ ।
यी दुई विवाद जोडिएका मुद्दामा यसअघि नै सर्वोच्च अदालतबाट प्रधानन्यायाधीश चोलेन्द्रशम्सेर जबरा र न्यायाधीश डा. कुमार चुडालको छुट्टाछुट्टै इजलासले अन्तरिम आदेश दिएको थिएन ।
तर अब लगातार सुनुवाइ गरेर अन्तिम फैसला दिने क्रममा अदालती प्रक्रिया आएको छ । यो निक्कै महत्वकांक्षी विषय भएकाले फैसलाको प्रतिक्षामा आम नेपाली रहेको देखिन्छ ।
