नवलपुर : पूर्वी नवलपरासीको पूर्व–पश्चिम राजमार्गमा पर्ने गैंडाकोट नगरपालिका वडा नम्बर–१५, अमरापुरीमा बस र ट्रक ठोक्किँदा १५ जना घाइते भएका छन्। पश्चिमबाट पूर्वतर्फ आउँदै गरेको ना५ख ५९२२ नम्बरको ट्रकमा सोही दिशा (गुल्मीबाट काठमाडौँ) जादै गरेको लु२ख ४२३४ नम्बरको रात्रि बस ठोक्किँदा उक्त दुर्घटना भएको हो।

दुर्घटनामा हुँदा बसमा सवार ४० जनामध्य १५ जना घाइते भएको इलाका प्रहरी कार्यालय गैँडाकोटले जनाएको छ। घाइतेहरूलाई उपचारको लागि चितवनको भरतपुरस्थित पुरानो मेडिकल कलेज लेराइएको प्रहरीले जनाएको छ।

ट्रक र ट्रकका चालक भने अस्थायी प्रहरी पोष्ट बेल्डियाको नियन्त्रणमा छन्। दुर्घटनामा परी रूपन्देही, गुल्मी, रोल्पा र अर्घाखाँचीका यात्रुहरू घाइते भएका छन्। घाइतेहरूमध्ये केहीको अवस्था सामान्य छ भने केहीको मध्यम रहेको प्रहरीले जनाएको छ।

घाइते हुनेहरूको विवरण :

रूपेन्देही जिल्ला सियारी गाउँपालिका वडा नं. ७ बस्ने वर्ष ३२ का सुगम केवट (मध्यम), बुटवल उपमहानगरपालिका वडा नं. १३ बस्ने वर्ष २३का शिवहरी मरासैनी (मध्यम), गुल्मी जिल्ला छत्रकोट गाउँपालिका वडा नं. ३ बस्ने वर्ष ४० की मीना भुसाल (सामान्य), सोही जिल्ला धुर्कोट गाउँपालिका वडा नं. ७ बस्ने वर्ष ४० का नारायण परियार (मध्यम), धुर्कोट गाउँपालिका वडा नं. ३ बस्ने वर्ष २५ का अर्जुन परियार (सामान्य), वर्ष ३० का राजु कुमाल (मध्यम), बसचालक रेसुङ्गा गाउँपालिका वडा नं.–४ बस्ने वर्ष ३२ को हेमन्तजंग बुढाथोकी, (सामान्य), दरवाङ गाउँपालिका वडा नं.–६ बस्ने वर्ष २४ का शक्ति कुँवर (सामान्य) र छत्रकोट गाउँपालिका वडा नं.–३ बस्ने वर्ष ३१ का कृष्णबहादुर गाहामगर (सामान्य) घाइते भएका हुन्।

यस्तै पाल्पा जिल्लाका २५ वर्षीय मेखबहादुर चुहान (सामान्य), रोल्पा जिल्ला बस्ने वर्ष ३० का शेखबहादुर घर्तीमगर (मध्ययम), रोल्पा जिल्ला लुम्रि गाउँपालिका वडा नं.–५ बस्ने वर्ष ४५ का धनबहादुर विष्ट (मध्यम) पनि घाइते भएका छन्। अर्घाखाँची जिल्ला छत्रदेव गाउँपालिका वडा नं.–१ बस्ने वर्ष ३८ का किरण दाहाल (मध्ययम), कालिकोट तिलगुफा नगरपालिका वडा नं. ४ बस्ने वर्ष १९ का वसन्त शाही (मध्यम), प्युठान झिम्रूक गाउँपालिका वडा नं.–१ बस्ने वर्ष २६ का शिव नेपाली (सामान्य) पनि घाइते भएका प्रहरीले जनाएको छ।

चितवन पोष्ट