भरतपुर : भरतपुर महानगरपालिकाले महानगर विद्यालयका विद्यार्थीहरुलाई साइकल वितरण गरेको छ । भरतपुर महानगरपालिका मेयर रेणु दाहालद्धारा विद्यालयका विपन्न परिवारका छात्राहरुलाई साइकल वितरण गरिएको हो ।

भरतपुर–२० को भीमनगरमा रहेको भीमनगर माध्यमिक विद्यालयमा एक कार्यक्रम गरी मेयर दाहालले वडा नं–१८, १९ र २० का गरी ८ विद्यालयका ६० जना विद्यार्थीहरुलाई साइकल वितरण गर्नुभएको हो ।

जोखिममा परेका महिलासँग मेयर कार्यक्रमअन्तर्गत विद्यालय शिक्षामा छात्राहरुको शैक्षिक निरन्तरताका लागि लक्षितवर्गका किशोरीहरुलाई साइकल हस्तान्तरण गरिएको हो ।

महानगरको यसै आर्थिक वर्षको योजनाअन्तर्गत साइकल हस्तान्तरण गरिएको हो । यस आर्थिक वर्षमा १० वटा वडामा २०० साइकल वितरण गर्ने योजना रहेको र अघिल्लो आर्थिक वर्षमा १२ वटा वडामा ३२४ वटा साइकल हस्तान्तरण गरिएको मेयर रेनु दाहालले बताउनुभयो ।

मेयर दाहालले महानगरका विद्यालयलाई छात्रामैत्री र प्रविधिमैत्री बनाउन लागिपरेको बताउनुभयो । महानगरका आधारभूत विद्यालयलाई ल्यापटप वितरण थालेको र सबै विद्यालयहरुमा इन्टरनेटको प्रबन्ध गरिने उहाले बताउनुभयो । १ सय २३ वटा सामुदायिक विद्यालयमध्ये ६० वटा विद्यालयको भौतिक संरचना निर्माण अहिले महानगरले गरिरहेको उहाले बताउनुभयो ।

साइकलका कारण विद्यालय जान–आउन सजिलो हुने र यसले गर्दा पढाइलाई निरन्तरता दिन सहज हुने छात्राहरुले बताएका छन् ।

वितरण कार्यक्रममा भरतपुर महानगरपालिका–२० का कार्यवाहक वडाध्यक्ष यज्ञप्रसाद घिमिरेको सभापतित्वमा सम्पन्न कार्यक्रममा भीमनगर माविका प्रधानाध्यापक कोमलनाथ घिमिरे, सामाजिक विकास अधिकृत कलावति ओझा, विद्यालय व्यवस्थापन समितिका अध्यक्ष श्रीलाल अधिकारीलगायतले मन्तव्य व्यक्त गरेका थिए ।