काठमाडौँ, २ असोज । नियुक्त भएको दुई महिना वितिसक्दा पनि सरकार विस्तार र प्रभावकारी काम गर्न नसकेको भन्दै आलोचना खेपिरहेका प्रधानमन्त्री शेरबहादुर देउवाले आफू नेतृत्वको सरकारले दुई महिनाभित्र गरेका १५ कामको सूची सार्वजनिक गरेका छन्।

प्रधानमन्त्रीको सचिवालयले शनिबार देउवा नेतृत्वको सरकारले गरेको १५ कामको सूची सार्वजनिक गरेको हो। पाँच दलीय गठबन्धनको समर्थनमा सरकारको नेतृत्व गरेका देउवाले ६ जनाको मन्त्रिमण्डल बनाएपनि मन्त्रिपरिषद्लाई पूर्णता दिन सकेका छैनन्।

१७ मन्त्रालयको जिम्मेवारी देउवाले आफैंसँग राखेका छन्। देश आर्थिक ‘सट डाउन’ मा पुगेको छ। बजेटसम्बन्धी तीन अध्यादेश प्रतिस्थापन विधेयक संसदमा रहेका छन् र विधेयक पारित हुने सम्भावना न्यून देखिएको छ।

कोभिड-१९ संकट व्यवस्थापन अध्यादेश देखि औषधि अध्यादेश निष्क्रिय भएका छन्। जसका कारण कोभिड उपचार र खोप खरिदका काममा समस्या आउने देखिएको छ।

यसबीचमा देउवाको सचिवालयले कोरोना महामारी नियन्त्रणलाई उच्च प्राथमिकता दिएको भन्दै आफ्नो कार्यकालमा भएका प्रमुख १५ उपलब्धि सार्वजनिक गरेको छ।

उक्त १५ उपलब्धिमा स्वास्थ्य क्षेत्रका ५ काम परेका छन्।

जसको एक नम्बर बुँदामा कोरोना महामारी नियन्त्रणलाई उच्च प्राथमिकता दिएको विषय छ।

यस्तै खोप केन्द्रको चुस्त व्यवस्थापन र एकैदिन तीन लाखलाई खोप दिन सफलता, १८ वर्षमुनिका बालबालिकालाई दिइने ४० लाख मात्रा मोर्डना खोपको टुंगो, क्यान्सर, मिर्गौला र स्पाइनल इन्जुरीका बिरामीलाई मासिक ५ हजार भत्ताको घोषणा र स्वास्थ्यकर्मीको तलब बृद्धि गरेको विषय उपलब्धिमा राखिएको छ।