नवलपरासी, कार्तिक २४- शैक्षिक भ्रमणका लागि पूर्वी नवलपरासीको हुप्सेकोटबाट धरान गएको बस दुर्घटनामा पर्दा १६ विद्यार्थी घाइते भएका छन् ।

धरान उपमहानगरपालिका–१३ स्थित धरान–धनकुटा सडकखण्डमा शैक्षिक भ्रमणमा गएको ३ वटा बस शुक्रबार साँझ एक आपसमा जुघेको हो । सबै विद्यार्थीको अवस्था खतरामुक्त रहेको जिल्ला प्रहरी कार्यालय पूर्वी नवलपरासीले जनाएको छ

हुप्सेकोट गाउँपालिका ४ स्थित जनकल्याण राष्ट्रिय माविका विद्यार्थी बोकेको बस सु.प.प्र ०२००१ ख ११०८ ब्रेकफेल भएपछि अरु २ वटा बसलाई ठक्कर दिएर दुर्घटना भएको हो ।

स्याङ्जा, पूर्वी नवलपरासी र म्याग्दीबाट शैक्षिक भ्रमणमा विद्यार्थी बोकेर गएका बस आपसमा ठोक्किएर दुर्घटना भएको प्रहरीले जनायो । ब्रेकफेल भएको हुप्सेकोटको बसले म्याग्दीबाट शैक्षिक भ्रमणमा गएको ग २ ख १५८३ नम्बरको बसलाई पछाडिबाट ठक्कर दिएपछि म्याग्दीको बस पल्टेको प्रहरीले जनायो ।
स्याङ्जाको विद्यार्थी बोकेको ग २ ख १५१३ नम्बरको सहित तीनवटा बस ठोक्किएको हो । घाइतेहरुको बीपी कोइराला स्वास्थ्य विज्ञान प्रतिष्ठान धरानमा उपचार भइरहेको छ ।