चितवन । जिल्ला प्रशासन कार्यालय चितवनले तिहारमा जुवा, तास, खडखडे नखेल्नु र नखेलाउन अनुरोध गरेको छ । प्रशासनले आज एक सूचना जारी गर्दै यस वर्षको तिहार, छठ र नेपाल सम्बत्लाई शिष्ट र मर्यादित बनाउन सो सूचना जारी गरेको हो ।
सूचनामा पटका, भूईचम्पालगायतका बिस्फोटक पदार्थ उत्पादन, भण्डारण, बिक्री बितरण, परिवहन र पैठारी नगर्न भनेको छ । देउँसी भैलो बेलुकी ९ बजेसम्म गर्न र जुवा, तास, कौडा, सट्टेबाजी, खडखडेलगायतका नखेल्ने, नखेलाउन आव्हान गरेको छ । त्यसैगरी चितवनमा मदिरा र मदिराजन्य बस्तुको बिक्री बितरण राति ९ बजेसम्म अनुमतिप्राप्त व्यवसायीहरुबाट मात्र गर्न र स्वीकृति नलिई चिठ्ठा, उपहारका कार्यक्रम नगर्न पनि प्रशासनले अनुरोध गरेको छ ।
प्रशासनको सूचनामा कुनै पनि कार्यक्रम गर्दा सामाजिक शिष्टाचार कायम गर्दे व्यापारीहरुले पसलमा अनिवार्य मूल्यसूची राख्न पनि निर्देशन दिएको छ । यदि कानुन विपरितका गतिविधि गरे स्थानीय प्रशासन ऐन–२०२८ बमोजिम कारबाही हुने सूचनामा उल्लेख छ ।
