१३, चैत, चितवन-

प्रेस चौतारी चितवनका पूर्व अध्यक्ष कविकिरण न्यौपानेले जन्मदिनको अवसरमा प्रेस चौतारी चितवनले स्थापना गरेको पत्रकार कल्याणकारी कोषलाई नगद १० हजार आर्थिक सहयोग गरेका छन् ।

हाल जापानमा रहनुभएका पूर्व अध्यक्ष न्यौपानेले प्रेस चौतारी चितवनका पूर्व अध्यक्ष एवम् पूर्व केन्द्रीय सदस्य हरिप्रसाद पोखरेललाई सो रकम हस्तान्तरण गरेका हुन् ।

पत्रकारहरूको पेशागत हकहित, पत्रकारिता क्षेत्रको विकासमा टेवा पुर्‍याउन तथा संस्थागत उन्नयनमा कल्याणकारी कोषले महत्त्वपूर्ण भूमिका खेल्ने विश्वास पूर्व अध्यक्ष न्यौपानेले व्यक्त गरे ।जापानमा रहि सञ्चार क्षेत्रमा क्रियाशिल रहेका न्यौपाने नेपाल पत्रकार महासंघ, जापानका संस्थापक एवम् वर्तमान सल्लाहकार हुन्। उनी अभिमतपत्र डटकमका कार्यकारी सम्पादक हुन्। जापानबाट प्रकाशित एकमात्र नेपाली पत्रिका नेपाली समाचार तथा समुन्द्रपारि डटकमका न्यौपाने समाचार प्रमुख छन्।

सञ्चारकर्मीहरुको कृयाशिल संस्था प्रेस चौतारी नेपाल , चितवनको पाँचौं पूर्ण बैठकले प्रेस चौतारी चितवनको भवन निर्माण समितिको सदस्य यसअघि नै चयन गरेको छ ।
प्रेस चौतारी चितवनले निर्माण गर्न लागेको सामुदायिक भवनको लागि जापानबाट यथासक्दो सहयोग संकलन गरेर हस्तान्त्ररण गरिने न्यौपानेले बताए ।

चौतारी चितवनका अध्यक्ष सुवास पण्डितका अनुसार पत्रकारिता पेसामा निरन्तर लागिरहेका पत्रकारहरूलाई असहज अवस्था सिर्जना हुँदा आर्थिक रूपमा सहयोग गर्ने, उत्कृष्ट कार्य गरे बापत पुरस्कार तथा सम्मान गर्ने र संगठनलाई चलायमान बनाउने मुख्य उद्देश्य राखेर उक्त कोष स्थापना गरिएको हो ।

प्रेस चौतारी चितवनले पत्रकारलाई स्वास्थ्य उपचारमा सहयोग पुर्‍याउन, संगठन सुदृढीकरण र पत्रकारहरूको क्षमता अभिवृद्धि गर्न, पत्रकारहरू बिरामी वा दुर्घटनामा परी उपचार गर्नुपर्ने अवस्थामा आर्थिक सहयोग गर्न कोष स्थापना गरेको हो । साथै चौतारीमा आबद्ध कुनै सदस्यको मृत्यु भएमा कोषबाट आर्जित व्याज तथा अन्य सहयोगबाट २० हजार रुपैयाँ सहयोग गर्ने कल्याणकारी कोष कार्यविधिमा उल्लेख छ । कोषमा हालसम्म १ लाख २० हजार भन्दा बढि रकम संकलन भैसकेको छ ।