चितवन, वैशाख २०- चितवनमा एआई तथा डिजिटल मार्केटिङ अभिमुखीकरण कार्यक्रम सम्पन्न भएको छ । जिल्लाका उद्योगी व्यवसायीलाई लक्षित गर्दै हिजो (शनिबार) सूचना, सञ्चार तथा प्रविधि दिवस २०८३ को अवसरमा चितवन उद्योग वाणिज्य संघ र कम्प्युटर एशोसियसन नेपाल चितवनको संयुक्त आयोजनामा एआई तथा डिजिटल मार्केटिङ अभिमुखीकरण कार्यक्रम सम्पन्न भएको हो ।

वर्तमान समयमा एआई प्रयोगबाट डिजिटल मार्केटिङ कसरी गर्न सकिन्छ भन्ने उद्देश्यले कार्यक्रम आयोजना गरिएको थियो । कार्यक्रममा बोल्दै कार्यक्रममा प्रमुख अतिथि जिल्ला प्रशासन कार्यालय चितवनका प्रमुख जिल्ला अधिकारी गणेश अर्यालले सूचना प्रविधि विकासको मेरुदण्ड भएको बताउँनु भएको थियो । सूचना प्रविधि अहिले नराम्रो कुरामा पनि विकास भएकोले यसको प्रयोगमा ध्यान दिन आवश्यक रहेको उहाँले बताउँनु भएको छ ।

चितवन उद्योग वाणिज्य संघका वरिष्ठ उपाध्यक्ष राजेन्द्र ओलीले कृषि, शिक्षा, पर्यटन र स्वास्थ्य क्षेत्रमा काम गर्दै आएकोमा यस वर्षदेखि सूचना प्रविधिलाई पनि विकासको पूर्वाधारको रुपमा अगाडी सारेको बताउनुभयो । कार्यक्रममा स्वागत मन्तव्य राख्दै कम्प्युटर एशोसियसन नेपाल महासंघ जिल्ला शाखा चितवनका अध्यक्ष विष्णुप्रसाद लामिछानेका अनुसार सूचना प्रविधिले डिजिटल मार्केटिङ गर्न सहज बनाएपनि साइबर हमलाको घटना बढ्दै गएकोले त्यस सम्बन्धी नीति नियमको बारेमा सबैले बझ्न आवश्यक रहेको छ ।

कार्यक्रममा क्यान नेपाल केन्द्रीय सदस्य भानु शर्माले नेपालको समग्र विकासमा सूचना प्रविधिले महत्वपूर्ण भूमिका खेलेको बताउँदै नेपालमा सूचना प्रविधिको विकासको क्रमका बारेमा बताउनुभएको थियो । कार्यक्रममा डिजिटल मार्केटिङ सम्बन्धी प्रा. डा. हरि भण्डारीले प्रस्तुतिकरण दिनुभएको थियो भने एआई सम्बन्धी डा.लोकेश गुप्ताले प्रस्तुतिकरण दिनुभएको थियो ।