काठमाडौं । दुवै मृगौला फेल भएका मुगु खत्याड गाउँपालिकाका २४ वर्षीय हरिलाल थापा उपचार खर्च सहयोगका लागि अपिल गरेका छन् ।

फागुन २०७८ मा थापालाई स्वास्थ्य समस्या आएपछि नेपालगञ्जको नर्सिङ होम परीक्षण गर्दा दुवै मृर्गौला फेल भएको पाइएको थियो । नर्सिङ होमले थप उपचारका लागि त्रिभुवन विश्वविद्यालय शिक्षण अस्पतालमा रिफर गरेको थियो ।

२४ वर्षीय थापाको हाल ज्ञानेश्वर स्थित हिमाल हस्पिटल प्रा.लि.मा नियमित डायलाइसिस भइरहेको छ । तर, डायलाइसिस सेवा सरकारले निःशुल्क गरेपनि रगत र सिरिञ्जका सामग्री खरिद गर्न पैसा आफैंले तिनुपर्छ । ‘हप्ताको दुई पटक डायलाइसिस गर्नुपरेको छ । कम्तिमा पनि चार हजार खर्च हुन्छ,’ थापाले अनलाइखबरसँग भने,’ त्यो खर्च पनि जुटाउन सकेको छैन ।’

चिकित्सकका अनुसार उनको अवस्था चौथो चरणमा पुगेकाले मृर्गौला फेर्नुको विकल्प छैन । चिकित्सकले प्रत्यारोपण गर्नुपर्ने बताएपनि खर्च अभावमा परिवारको कसले दिन मिल्ने भन्ने जाँच गर्न समेत नसकेको थापाले बताए । ‘ मृर्गौला कसको मिल्छ भनेर जाँच गर्न पनि पैसा छैन । घरपरिवारमा बुढाबढी भइसक्नुभएको बुबा–आमा हुनुहुन्छ । अन्य कोही पैसा कमाउने मानिस छैन,’ थापाले गुनासो गरे,’ घरमा सानी छोरी छिन् । परिवारको साथमा बस्न मन छ । बिन्ती सहयोग गरिदिनुहोला ।’

थापा हाल काठमाडौंमा आफन्तको डेरामा बसेर नियमित डायलासिस गरिहेको छन् । अहिलेसम्म उपचारमा तीन लाखभन्दा बढी खर्च भइसकेको छ । उनले आफूलाई बचाइन दिन सबैसँग आग्रह गरेका छन् ।

थापाको सम्पर्क नम्बर ९८०२५३०१८ रहेको छ । सहयोग गर्न चाहने महानुभावले राष्ट्रिय बाणिज्य बैंकमा रहेको खाता नम्बर ११७०१००६०३३२१०१० रकम जम्मा गर्न सक्नुहुनेछ ।