सुरक्षाको निहुँमा चिनियाँ कम्पनीमाथि भेदभावपूर्ण व्यवहार गरिएको भन्दै चीनले त्यस्ता कदमहरू तत्काल सच्याउन भारतसमक्ष अपिल गरेको छ ।
साथै, यस्तै भेदभाव जारी रहे चीन-भारत आपसी सहयोगमा समेत ठूलो क्षति पुग्नसक्ने चेतावनी पनि चीनले दिएको छ ।
बुधबार बेइजिङमा पत्रकार सम्मेलन गर्दै चिनियाँ परराष्ट्र मन्त्रालयका प्रवक्ता चाउ ली च्येनले भारतले हालसम्म ४३ वटा चिनियाँ पृष्ठभूमि भएका मोबाइल एपहरू प्रयोगमा प्रतिबन्ध लगाएको भन्दै यो आपसी सम्बन्धका लागि हानिकारक भएको प्रतिक्रिया दिए ।
यसअघि लद्दाखको गलवान उपत्यकामा करिब २० जना भारतीय सैनिकको ज्यान जाने गरी चिनियाँ र भारतीय सेनाबीच भएको हिंसात्मक झडपपछि भारतले चिनियाँ एपहरूमाथि प्रतिबन्ध लगाएको थियो ।
भारतको इलेक्ट्रोनिक्स तथा आईटी मन्त्रालयले केही एपहरूले भारतीय सम्प्रभुता तथा एकता, सुरक्षा तथा व्यवस्थापनमा क्षति पुर्याउनसक्ने भन्दै ५९ वटा एपमाथि प्रतिबन्ध घोषणा गरेको थियो । भारतले चीनका एप भनेर किटान नगरेपनि प्रतिबन्धित अधिकांश एपहरू चीनमा बनेका वा चिनियाँ कम्पनीका थिए । तीमध्ये सबैभन्दा लोकप्रिय टिकटक, वीच्याट, युसी ब्राउजर, शेयर इट लगायत थिए।
‘गत जुनदेखि लगातार ४ पटक गरि राष्ट्रिय सुरक्षाको कारण देखाउँदै चिनियाँ पृष्ठभूमिका मोबाइल एप्स प्रयोगमा निषेधात्मक कदम चालेको छ जुन कानुन विपरीत छ,’ प्रवक्ता चाउले भने, ‘भारतको यो कदम बजार सिद्धान्त तथा विश्व व्यापार संगठनको नियम विपरीत भएको छर्लङ्गै छ ।’
चीनले आफ्ना व्यवसायको वैधानिक हक-अधिकारका विरूद्ध कडा रुपमा प्रस्तुत हुने चेतावनी दिएको छ । परराष्ट्र प्रवक्ता चाउले बजार सिद्धान्तको पालना गर्दै अन्तर्राष्ट्रिय लगानीकर्ताको वैधानिक हक-अधिकारको संरक्षण गर्ने जिम्मेवारी भारतले देखाउनुपर्ने बताए ।
