काठमाडौं । ओमिक्रोन भेरियन्टले विश्वलाई त्रसित बनाइरहेको छ । यो आतंक मत्थर हुन पाएकै छैन, कोरोनाकै अर्को भेरियन्ट ‘नियोकोभ’ फैलिने जोखिम रहेको चर्चा हुन थालेको छ । चिनियाँ वैज्ञानिकहरुले उक्त खतरनाक भेरियन्ट फैलनसक्ने भन्दै सर्तक रहन सुझाव समेत दिएका छन् ।

ओमिक्रोनपछि कोरोनाको नयाँ खतरनाक भेरिएन्ट फेला परेको छ । चीनको वुहानका वैज्ञानिकहरुले नयाँ भेरिएन्ट नियोकोभ निकै खतरनाक भएको दावी गरेका छन् ।

न्यूज १८मा प्रकाशित एक रिपोर्ट अनुसार, दक्षिण अफ्रिकामा फेला परेको नियोकोभ नामक नयाँ भेरिएन्टबाट संक्रमण र मृत्यु दर निै बढी छ । यसमा हरेक तीनजना बिरामीमध्ये एकको मृत्यु हुने उनीहरुको दावी छ ।

तर रुसको समाचार एजेन्सी स्पुतनिकले भने यो भेरियन्ट नयाँ नभएर कोरोनाकै मर्स कोभ भाइरससँग जोडिएको बताएका छन् । सन् २१०२ र २०१५ मा पश्चिम एशियाली देशहरुमा यसका बिरामी देखिएका थिए । दक्षिण अफ्रिकामा भने अहिले यो नियोकोभ भेरिएन्ट चमेरोहरुमा देखिएको छ ।

बायोआरएक्सआइभी वेभसाइटमा प्रकाशित शोधका अनुसार, नियोकोभ र यसका सहयोगी भाइरसPDF-2180-CoV ले मानिसलाई पनि संक्रमित बनाउन सक्छन् । वुहान युनिभर्सिटी र चाइन एकेडेमी अफ साइन्सेजका अनुसन्धानकर्ताका अनुसार, यो नयाँ कोरोना भाइरसलाई मानिसको कोषलाई संक्रमित गर्न एकपटक म्यूटेशन गरे पुग्छ ।

केही दिनअघिसम्म ओमिक्रोनको सब स्ट्रेन बिए २ ले आतंक फैलाएको थियो । ओमिक्रोनका यी सहायक भेरियन्ट निकै खतरनाक छन किनभने यिनलाई आरटी पिसिआरले पनि नदेखाउन सक्छ । अहिलेसम्म यो नयाँ सब भेरिएन्ट भारतलगायत संसारका ४० देशमा फैलिसकेको छ ।

भाइरसको नयाँ भेरियन्ट नियोकोभलाई लिएर चीनका वैज्ञानिकले विश्वलाई चेतावनी दिएका छन् । यो भेरियन्टको बारेमा शोध गर्ने वैज्ञानिकले भनेका छन्, ‘यो नयाँ भेरियन्ट एकदमै बढी संक्रामक र खतरनाक छ ।’

वैज्ञानिकले यस नयाँ शोधलाई वेबसाइटमा प्रकाशित गरेका छन् । शोधपत्रमा भनिएको छ, कोरोनाको नयाँ भेरियन्ट नियोकोभ र त्यसको सहयोगी भेरियन्ट पीडीएफ–२१८० कोभले मान्छेलाई एकदमै तीव्र रुपमा संक्रमित गर्न सक्छ । यस सोधमा लेखिएको छ, यस भाइरसको संक्रमण हुने तीनमध्ये एक जनाको मृत्यु हुनसक्छ ।

वुहान विश्वविद्यालय र चाइना एकेडेमी अफ साइन्सेसका वैज्ञानिक र शोधकर्ताले नियोकोभ भाइरसबारे चेतावनी दिएका हुन् । वैज्ञानिकका अनुसार कोरोनाको नयाँ भेरियन्ट नियोकोभले मानिसलाई संक्रमित बनाउन केवल एक म्युटेसन भए पुग्छ । चीनका वैज्ञानिकले चेतावनी दिएसँगै रुसका सरकारी भाइरोलोजी शोध केन्द्रले पनि यस विषयमा आफ्नो धारणा राखेको छ । रुसका सरकारी भायरोलोजी शोध केन्द्रका अनुसार चीनका वैज्ञानिकले जारी गरेको आँकडा अनुसार उक्त भेरियन्ट अहिलेसम्म मान्छेलाई संक्रमित गर्न सक्षम छैन । उनीहरुले यसको जोखिमलाई मध्यनजर गर्दै थप खोज अनुसन्धानको जरुरी छ ।