इलाम : इलामको एक चिया कारखानामा आगलागी हुँदा १० करोड वरावरको क्षति भएको छ । सूर्योदय नगरपालिका वडा नम्बर ४ अन्तुमा रहेको इलाम टि प्रोड्युसर्स प्रालिको चिया कारखानामा आइतबार दिउँसो ३ः३० बजेतिर आगलागी भएको हो । आगलागीबाट कारखाना पूर्णरुपमा जलेर नष्ट भएको छ ।

आगलागी सोमबार बिहानमात्र नियन्त्रणमा आएको थियो । साँझ अबेरसम्म आगो नियन्त्रणका लागि दमकल खटिए पनि पूर्णरुपमा नियन्त्रणमा आउन सकेको थिएन ।

चिया उत्पादनको सिजन सकिएकाले केही दिनदेखि बन्द रहेको कारखानाको बीचबाट आइतबार दिउँसो अचानक धुवाँ र आगोको मुस्लो निस्किएको थियो । आगो र धुवाँको मुस्लो उडेपछि स्थानीय र प्रहरी भेला भएर आगो नियन्त्रणको प्रयास गरिएको थियो । सूर्योदय नगरपालिकाको दमकल पनि आगो नियन्त्रणका लागि पुगेको थियो । तर, नियन्त्रणमा आउन नसकेको इलाम टी प्रोड्युसर्सका आइतबारे प्रमुख ओम काफ्लेले बताए ।

प्रालिको आइतबारे र अन्तुमा गरी दुई वटा चिया कारखाना छ । आगलागीबाट ९० लाख केजी तयारी चिया जल्दा चार करोड रुपैयाँ क्षति भएको बताइएको छ । कारखानाको मेशिन, भवन र अन्य सामग्री जलेर नष्ट हुँदा थप छ करोड रुपैयाँ नोक्सानी भएको काफ्लेले दाबी गरेका छन् । चिया प्रशोधनको सिजन अफ भएर कारखाना बन्द रहेको बेला विद्युत सर्ट भएर आगलागी भएको अनुमान गरिएको छ ।