चितवन, १७ जेठ । चितवनको भरतपुर–१० मा रहेको इडन गार्डेन इङ्लिस सेकेन्डरी स्कुलले शैक्षिक सत्र २०८२ मा नयाँ भर्ना भएका विद्यार्थीको स्वागत एवम् केही दिन अगाडि निर्वाचित विद्यार्थी नेताहरुको पदस्थापन गरेको छ ।
विद्यालयले शुक्रबार भव्य कार्यक्रमको आयोजना गरी नवआगन्तुक विद्यार्थीहरूको स्वागत तथा मायाको चिनो प्रदान एवम् प्रजातान्त्रिक अभ्यासबाट निर्वाचित विद्यार्थी नेतृत्वको पदस्थापन गरेको हो । कार्यक्रममा विभिन्न सदनहरूमा निर्वाचित विद्यार्थीहरूलाई व्याच वितरण साथै साप्ताहिक शुक्रबारीय अतिरिक्त कार्यक्रममा विजेता विद्यार्थीलाई पुरस्कार वितरण गरिएको छ । सो कार्यक्रममा विद्यार्थीहरुले विभिन्न सांस्कृतिक प्रस्तुतीहरु समेत राखेका थिए ।
कार्यक्रममा इडन गार्डेन इङ्लिस सेकेन्डरी स्कुल एवं मिलेनियम मोडल कलेजका प्राचार्य ईश्वरराज पण्डितले विद्यालयमा आयोजना गरिने अतिरिक्त कार्यक्रममले विद्यार्थीको कला एवं नेतृत्व विकासमा टेवा पुग्ने बताउनुभयो । विद्यालय सधैँ विद्यार्थी एवं अभिभावक समक्ष यस्तै कार्यक्रम सहित जोडिने र सल्लाह सुझाव लिई त्यही अनुसार अगाडि बढ्ने भन्ने प्रतिबद्धता प्रकट गर्नुभयो । भव्य र सभ्यरुपमा कार्यक्रम सम्पन्न गर्न सहयोग गर्नेहरुप्रति आभार व्यक्त गर्दै सबै सबैलाई धन्यवाद ज्ञापन गर्नुभयो ।
कार्यक्रममा इडन गार्डेन इङ्लिस सेकेन्डरी स्कुल तथा मिलेनियम मोडल कलेजका शैक्षिक संयोजक प्रकाश सुवेदीले विद्यालयमा भएका विभिन्न शैक्षिक गतिविधिहरूका बारेमा अवगत गराउनुभयो । नवआगन्तुक विद्यार्थीहरूले आफ्नो शैक्षिक यात्राको लागि सही विद्यालय चयन गरेको भन्दै उहाँले अभिभावकहरूले आशा गरे अनुसारको शिक्षा प्रदान गरी विद्यार्थीलाई कुशल नागरिक बनाएर निकाल्ने जिम्मेवारी विद्यालयको काँधमा दिएकोमा धन्यवाद व्यक्त गर्नुभयो । सुवेदीले अभिभावकहरुको आशा र भरोसालाई विद्यालय परिवारले पूरा गर्ने प्रतिबद्धता समेत व्यक्त गर्नुभयो ।
कार्यक्रममा नवनिर्वाचित विद्यार्थी नेतृत्वहरूले आफ्ना मन्तव्य र प्रतिबद्धता व्यक्त गरेका थिए । यसैबीच विद्यालयको स्काउट ट्रुपले स्वागत मार्च पास एवं राष्ट्रभक्ति गीतमा नृत्य प्रस्तुत गरेका थिए । इडन गार्डेन इङ्लिस सेकेन्डरी स्कुल एवं मिलेनियम मोडल कलेजका प्राचार्य ईश्वरराज पण्डितको अध्यक्षतामा भएको कार्यक्रममा शैक्षिक संयोजक प्रकाश सुवेदीले स्वागत मन्तव्य राख्नुभएको थियो ।
कार्यक्रममा विद्यालयका निवर्तमान प्राचार्य एवं विद्यालय सञ्चालक समितिका सदस्य प्रेमहरि सुवेदी, विद्यालयका सहायक प्राचार्य मुक्तिनाथ अधिकारी, विद्यालयका शिक्षक अभिभावक सङ्घका पदाधिकारी, नव आगन्तुक विद्यार्थीका अभिभावकको उपस्थिति रहेको थियो । विद्यालयका अतिरिक्त क्रियाकलाप प्रमुख सन्दिप पाण्डेले कार्यक्रमको संयोजन गर्नुभएको थियो भने कार्यक्रम सञ्चालन विद्यार्थीहरू सृष्टि थापा, सारिका लामा र प्रिया पटेलले गर्नुभएको थियो ।
