नवलपुर, ३ वैशाख । सवारीचालक अनुमति पत्रका लागि यातायात व्यवस्था कार्यालय कावासोतीको ट्रायल सेन्टरको रुपमा रहेको कावासोती ट्रायल सेन्टरको नाम परिवर्तन गरिएको छ ।

कम्पनी रजिष्ट्रारको कार्यालयको चैत २५ गतेको निर्णयअनुसार ट्रायल सेन्टरको नाम नवलपुर ट्रायल सेन्टर राखिएको हो । ट्रायल सेन्टरले नयाँ नामअनुसार काम सुरु गरिसकेको सञ्चालक प्रविन सापकोटाले जानकारी दिनुभयो । “पुरानो नाम सीमित क्षेत्रलाई समेटेको जस्तो मानेर नाम परिवर्तन गरिएको हो” सापकोटाले भन्नुभयो, “समग्र जिल्लालाई प्रतिनिधित्व गर्नेगरी नाम राख्दा उपयुक्त ठानेर कावासोती नवलपुर ट्रायल सेन्टर नाम राख्न निवेदन दिएर प्रकृया पुरा गरेपछि नाम परिवर्तन भएको हो ।”

ट्रायल सेन्टरको सेवा क्षेत्र विस्तार र पहिचानलाई एकीकृत बनाउने गरी ट्रायल सेन्टरको नाम परिवर्तन गरिएको उहाँको भनाइ छ । यातायात व्यवस्था कार्यालय कावासोतीले सवारी चालक अनुमति पत्र वितरणका लागि लिने ट्रायल परीक्षा यसै नवलपुर ट्रायल सेन्टरबाट नियमित हुँदै आएको छ । ट्रायल सेन्टरले नयाँ नामबाट सेवा प्रवाह सुरु गरेकाले सेवाग्राहीलाई नझुक्किन समेत उहाँले आग्रह गर्नुभयो ।

ट्रायल सेन्टरमा सवारी चालक अनुमति पत्रको ट्रायलसँगै अन्य दिनमा दक्ष प्रशिक्षकहरुबाट ट्राफिक नियमसहित प्रशिक्षण दिने गरिएको उहाँले बताउनुभयो । यस नवलपुर ट्रायल सेन्टरमा दुई पाङ्ग्रे तथा चार पाङ्ग्रे सवारीसाधनबाट ट्रायल पास हुनसक्नेगरी प्रशिक्षण दिइँदै आएको सापकोटाको भनाइ छ ।