नवलपुर, २३ चैत । नवलपुरको गैँडाकोटमा सडक किनारमा रहेको बिजुलीका पोलमा विभिन्न कन्सल्टेन्सीहरुले पोस्टर टाँस्ने तथा ब्यानर लगाउने गरेका छन् । जथाभावी पोलमा झुण्डाइएका र टाँसीएका विज्ञापन सामग्रीले नगरको सौन्दर्यतालाई नै कुरुप बनाएको छ ।

गैँडाकोटका सडक किनारमा रहेका बिजुलीका पोलमा विज्ञापन सामग्री राख्नेमा अधिकांश चितवनका कन्सल्टेन्सीहरु रहेका छन् । भरतपुरमा पोलमा विज्ञापन राख्दा नगरपालिका, विद्युत् र सडक विभागबाट स्वीकृति लिनुपर्ने भएपछि उनीहरु गैँडाकोटमा जथाभावी प्रचार सामग्री टाँस्दै हिँडेका छन् । गैँडाकोटमा पोलमा राखिएका होर्डिङ बोर्ड र विज्ञापन सामग्रीहरुलाइ कुनै पनि अनुमति नदिइएको नगरपालिकाले जनाएको छ ।

यद्यपि नारायणघाटको लायन्सचोकमा रहेको युनिभर्सल एजुकेशनले आफूहरुले अनुमति लिएर गैँडाकोटको सडक किनारका बिजुलीका पोलमा विज्ञापन सामग्री टाँसेको दाबी गरेका छन् । पोस्टर टाँस्दै हिँडेका युनिभर्सल एजुकेशनका कर्मचारीले नगरपालिकाबाट अनुमति लिएर पोस्टर टाँसेको भन्दै ती पोस्टर हटाएर देखाउन चुनौती दिएका छन् ।

कन्सल्टेन्सीको सञ्चालक समेत बताउने नेपाली काँग्रेस गैँडाकोट नगर समिति सभापति बद्रि सापकोटाले गैँडाकोटमा रहेका बिजुलीका पोलहरु फोहोर नै भएको उल्लेख गर्दै त्यहाँ टाँस्दा केही फोहोर नहुने बताए । उनले बिजुलीका पोलहरु के सफा छ र त्यहाँ टाँस्न नहुने हो ? भन्दै प्रति प्रश्न गरेका छन् ।

यस विषयमा नेपाल विद्युत प्राधिकरण गैँडाकोट प्रशाखाका प्रमुख इन्जिनियर सुजन रिजालसँग जानकारी लिँदा उनले आफूहरुले बिजुलीको पोलमा विज्ञापन सामग्री राख्न कसैलाई पनि अनुमति प्रदान नगरेको बताए । इन्टरनेट प्रदायकहरुले राखेबापत प्राधिकरणलाई शुल्क तिर्ने गरेको भन्दै अरुले पनि अनुमति लिएर विज्ञापन गर्न पाउने तर त्यसमा पनि नगरपालिकाको अनुमति अनिवार्य भएको बताए ।

यसैविषयमा गैँडाकोट नगरपालिकाका प्रमुख प्रशासकीय अधिकृत झविन्द्र खनालले आफूहरुले नगरपालिकाको क्षेत्राधिकारभित्र कसैलाई पनि विज्ञापन सामग्री राख्न अनुमति नदिएको बताए । अनुमति बिना राखिएका विज्ञापन सामग्री हटाउनुपर्ने उनको भनाइ छ । यसअघि नगरपालिकाले होर्डिङ बोर्ड राख्न विज्ञापन कर उठाउने गरी ठेक्का आह्वान गर्दा एकजनाले ठेक्का हालेपनि सम्झौता गर्न नआएको उल्लेख गर्दै त्यस‌ कम्पनीका सञ्चालकलाई कालोसूचिमा राख्न सिफारिस गर्ने निर्णय गरिएको बताए । हामीले गरेको टेलिफोन कुराकानीमा नगरपालिकाका प्रमुख प्रशासकीय अधिकृत खनालले कानुनी र लिखित रुपमा कसैलाई पनि विज्ञापन सामग्री राख्न नगरपालिकाले अनुमति नदिएको बताए ।

गैँडाकोट क्षेत्रका मुख्य राजमार्ग तथा भित्री सडक खण्डमा पर्ने बिजुलीका हरेक पोलमा कुनै न कुनै संस्थाको विज्ञापन राखिएको छ । पोलभरी अव्यवस्थित रुपमा राखिएको विज्ञापन सामग्रीले नगरको सुन्दरतामात्रै बिगारेको छैन, नगरपालिकाको आम्दानीमा समेत क्षति पुर्याएको छ ।