नवलपुर, २२ चैत । नवलपुरको गैँडाकोटमा रहेको मौलाकालिका समाज केन्द्र नेपालले आयोजना गरेको चैते दसैँ विशेष डोरी तान्ने प्रतियोगितामा प्रतिभा टोल पहिलो भएको छ । आज गैँडाकोट शान्ति वन बाटिकामा आयोजित गैँडाकोट वडा नम्बर १ र २ का अन्तर टोल विकास महिला समूहबीच भएको चैते दसैँ विशेष डोरी तान्ते प्रतियोगितामा मौलाकालिका टोल महिला समूह दोस्रो भएको छ ।

उक्त प्रतियोगितामा श्रीनगर एक्लेसाल टोल महिला समूह तेस्रो भएको मौलाकालिका समाज केन्द्र नेपालका अध्यक्ष गणेश अधिकारीले जानकारी दिनुभयो । यस प्रतियोगिताले महिलाहरूको उत्साहजनक सहभागिता र सामुदायिक मेलमिलापलाई अभिवृद्धि गरेको अध्यक्ष अधिकारीको भनाइ छ । प्रतियोगितामा महिला समूहहरुले उत्कृष्ट प्रदर्शन गरेका अधिकारीको भनाइ छ ।

गैँडाकोट नगरपालिका उपप्रमुख शान्ति कोइराला प्रमुख अतिथिको रुपमा रहनुभएको थियो भने वडा नं १ का वडाध्यक्ष सुरेन्द्रप्रसाद रेग्मी तथा वडा नम्बर २ का वडाध्यक्ष प्रकाश सापकोटा विशेष अतिथिको रुपमा सहभागी हुनुभएको थियो । सरस्वती निकेतन आवासीय माध्यमिक विद्यालयका प्राचार्य भरत कँडेल, केन्द्रका अनुगमन संयोजक शालीकराम सापकोटा, सल्लाहकार सदस्य शोभानाथ गौडेल, काशीनाथ कँडेल, कार्यसमिति सदस्य पुरुषोत्तम गौडेललगायतको उपस्थिति रहेको थियो । कार्यक्रम संयोजक रमेश ढकालले स्वागत मन्तव्य राख्नुभएको कार्यक्रमको सञ्चालन संस्थाका सहसचिव लक्ष्मण कँडेलले गर्नुभएको थियो ।

केन्द्रका अध्यक्ष गणेश अधिकारीको अध्यक्षतामा भएको यस कार्यक्रमको सफलताले सामुदायिक भावना र सशक्तीकरणलाई थप मजबुत बनाएको बताइएको छ ।