गैंडाकोट, ८ चैत ६ । नवलपुरको गैँडाकोटमा रहेको कालिका संस्कृत विद्यापीठको स्वतन्त्र विद्यार्थी युनियन (स्ववियु) सभापतिमा नेपाल विद्यार्थी (नेवि) संघका अनुप भण्डारी निर्वाचित हुनुभएको छ ।
गैँडाकोटमा शान्तिपूर्णरुपमा भएको निर्वाचनमा भण्डारीको नेतृत्वमा सर्वसम्मत नयाँ कार्यसमिति चयन गरिएको हो । कलेजको स्ववियु निर्वाचन समितिका संयोजक सह–प्राध्यापक कपीलदेव भट्टराईले निर्वाचन स्वतन्त्र, निष्पक्ष र सौहार्दपूर्ण वातावरणमा सम्पन्न भएको बताउनुभयो । नयाँ समितिको सचिवमा अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु)का कमल सापकोटा, कोषाध्यक्षमा नेविसंघका लक्ष्मणप्रसाद सापकोटा तथा सदस्यहरुमा नेविसंघका कृष्ण पौडेल, अनेरास्ववियुका सागर भुसाल, नेविसंघकी तुलसा पौडेल निर्वाचत हुनुभएको छ ।
त्यसैगरी, निर्वाचनमा समानुपातिकतर्फबाट सदस्यमा नेविसंघका मिलनकुमार पराजुली, अनेरास्ववियुका सुजन ढुंगेल, नेविसंघका ऋषि अधिकारी निर्वाचित हुनुभएको छ । नवनिर्वाचित विद्यार्थी प्रतिनिधिहरूले विद्यार्थीका हकहितका मुद्दालाई प्राथमिकता दिने प्रतिबद्धता जनाएका छन् । कलेजमा शिक्षाको गुणस्तर सुधार, भौतिक पूर्वाधारको अभिवृद्धि तथा विद्यार्थीका विविध आवश्यकताहरू समाधान गर्न पहल गर्ने बताएका छन् ।
विद्यापीठमा भएको यस निर्वाचनले विद्यार्थी राजनीतिमा स्वस्थ प्रतिस्पर्धा र लोकतान्त्रिक अभ्यासलाई बल दिने नवनिर्वाचित अध्यक्ष भण्डारीले बताउनुभयो ।
