काठमाडौं, फागुन २१-  अस्ट्रेलियाविरुद्ध चार विकेटको जित निकाल्दै भारत लगातार तेस्रो पटक आइसिसी च्याम्पियन्स ट्रफीको फाइनलमा प्रवेश गरेको छ।

सन् २०१३ को च्याम्पियन भारतले २०१७ को पछिल्लो संस्करणको फाइनलमा पाकिस्तानसँग हार बेहोरेको थियो। दुबई अन्तर्राष्ट्रिय क्रिकेट मैदानमा गएराति सम्पन्न पहिलो सेमिफाइनलमा अस्ट्रेलियाले दिएको २६५ रनको लक्ष्य भारतले ४८ दशलमव १ ओभरमा ६ विकेट गुमाउँदै पूरा गर्यो।

भारतका लागि विराट कोहलीले ९८ बलमा पाँच चौकाको मद्दतले सर्वाधिक ८४ रनको योगदान गरे। यसैगरी श्रेयस अय्यरले ४५, केएल राहुलले अविजित ४२, हार्दिक पाण्डेया र कप्तान रोहित शर्माले समान २८ तथा अक्षर पटेलले २७ रन बनाए।

तेस्रो विकेटका लागि विराट र श्रेयसबीच ९१ रनको साझेदारी गरे। अस्ट्रेलियाका लागि नाथन एलिस र एडम जम्पाले समान दुई तथा बेन्जामिन जेम्स द्वारशुइस र कुपर कोनोलीले समान एक विकेट लिए।

त्यसअघि टस जितेर ब्याटिङ रोजेको अस्ट्रेलियाले ४९ दशमलप ३ ओभरमा सबै विकेट गुमाउँदै २६४ रनको योगफल तयार पारेको थियो।

अस्ट्रेलियाका लागि कप्तान स्टिभ स्मिथले ९६ बलमा चार चौका र एक छक्काको मद्दतले सर्वाधिक ७३ रनको योगदान गरे। यसैगरी एलेक्स केरीले ५७ बलमा आठ चौका र एक छक्काको मद्दतले ६१, ट्रभिस हेडले ३९, मार्नुस लाबुसेनले २९, बेन्जामिन जेम्स द्वारशुइसले १९, जोस इङ्लिसले ११ र नाथन एलिसले १० रन बनाए।

स्मिथले तेस्रो विकेटका लागि लाबुसेनसँग ५६, पाँचौं विकेटका लागि केरीसँग ५४ र दोस्रो विकेटका लागि हेडसँग ५० रनको साझेदारी गरे।

भारतका लागि मोहम्मद शामीले तीन, वरुण चक्रवर्ती र रविन्द्र जडेजाले समान दुई तथा हार्दिक पाण्डेया र अक्षर पटेलले समान एक विकेट लिए।

भारतले उपाधिका लागि न्युजिल्यान्ड र दक्षिण अफ्रिकाबीचको विजेतासँग प्रतिस्पर्धा गर्नेछ। यी दुईबीचको खेल आज पाकिस्तानमा हुनेछ। फाइनल खेल आइतबार दुबईमा हुनेछ।