चितवन, ३ पुस । मानव बेचबिखन र लैंगिक हिंसाविरुद्ध क्रियाशील रहेको संस्था माइती नेपालले विदेशमा अलपत्र भएकाहरुको उद्धारका लागि चाँडो कार्यविधि ल्याउन माग गरेको छ ।
माइती नेपालले चितवनका प्रमुख जिल्ला अधिकारी प्रकाश पौडेलमार्फत नेपाल सरकारलाई ज्ञापनपत्र बुझाउँदै कार्यविधि बनाएर विदेशमा बेचिएका तथा अलपत्र परेका व्यक्तिलाई अभिलम्ब स्वदेश फर्काउन माग गरेको हो । माइती नेपाल चितवनका कार्यक्रम संयोजक ईश्वर गिरिले मावन बेचबिखन तथा ओसारपसार नियन्त्रण नियमावली २०६५ मा व्यवस्था भएअनुसार विदेशमा अलपत्र भएकाहरुको उद्धार गर्न तथा उनीहरुको सहमतिमा स्वदेश फिर्ता गर्ने कार्यविधि तत्काल लागू गर्नुपर्ने बताउनुभयो । विदेशमा अलपत्र परेकालाई स्वदेश फिर्ता गर्ने विषय नियमावलीमा व्यवस्था गरिएको भए पनि स्वदेश फिर्ती कार्यविधिको अभावमा उद्धार तथा स्वदेश फिर्ती नितान्त सीमित संस्थाहरुको पहलका आधारमा मात्रै भइरहेको गिरिको भनाइ छ ।
सरकारले जारी गरेको नियमावलीअनुसार छुट्टै स्वदेश फिर्ती कार्यविधि तयारीका लागि माइती नेपालले विभिन्न जिल्लामा मानव बेचबिखनबाट प्रभावितहरुको उद्धार, स्वदेश फिर्ती र सामाजिक पुनस्र्थापनाका लागि मानक सञ्चालन कार्यविधि हस्ताक्षर अभियान सञ्चालनमा ल्याएको उहाँले बताउनुभयो । ज्ञापनपत्रसँगै उक्त हस्ताक्षरसमेत प्रमुख जिल्ला अधिकारीमार्फत माइती नेपाल चितवनले नेपाल सरकारलाई पठाएको गिरिले बताउनुभयो । स्वदेश तथा विदेशमा बेचबिखनमा परेकाको उद्धार तथा स्वदेश फिर्तीेका लागि नेपाल भारत सीमा नाकाहरुमा विभिन्न समयमा त्यहाँ कार्यरत सरोकारवालासँग समन्वय गर्दै बेचिएकाहरुको उद्धार तथा स्वदेश फिर्ती अस्पष्टता भएको कुरा बारम्बार उठान भइरहेको विषयप्रति संस्थाको गम्भीर ध्यानाकर्षण भएको गिरिले बताउनुभयो ।
माइती नेपाल विगत ३२ वर्षदेखि मानव बेचबिखन र लैंगिक हिंसाविरुद्ध क्रियाशील रहँदै न्यायपूर्ण र विभेदपूर्ण समाज निर्माणका लागि अभियान चलाइरहेको संस्था हो । मानवबेचबिखन, जबरजस्ती करणी यौनजन्य हिंसा र महिला हिंसाका विविध पक्षहरुलाई समाधान गर्ने काममा माइती नेपाल राज्यसँग सहकार्य गर्दै आइरहेको छ । संस्थाले स्वदेश तथा विदेशमा बेचबिखनमा परेका महिला तथा बालबालिकाहरुको उद्धार, पुनर्स्थापना तथा उनीहरुको अधिकारको संरक्षणका लागि विभिन्न चेतनामूलक कार्यक्रम सञ्चालन गर्दै आइरहेको गिरिले बताउनुभयो ।
ज्ञापनपत्र बुझ्दै चितवनका प्रमुख जिल्ला प्रकाश पौडेलले मानव बेचबिखन नियन्त्रण गर्नका लागि समन्वय गर्ने काम स्थानीय प्रशासनले गर्ने भन्दै यसबारे आफू सचेत रहेको बताउनुभयो । देशको केन्द्रभागमा चितवन पर्ने हुँदा अन्यत्रबाट आएका व्यक्तिहरु चितवनमा बस्ने तथा यहाँबाट ओसारपसार गर्नसक्ने भन्दै होटल व्यवसायीलाईसमेत सचेत पारिएको पौडेलले बताउनुभयो । विभिन्न बाहना तथा प्रलोभनमा पारी स्वदेश तथा विदेशमा बेचबिखन हुने क्रम बढ्दै गएकाले यसको रोकथामका लागि सिंगो नागरिक समाज नै सचेत हुनुपर्ने पौडेलले बताउनुभयो ।