नवलपुर, २८ भदौ । नेपाल सरकारका उर्जा, जलस्रोत तथा सिँचाइ मन्त्री दीपक खड्काले मुलुक परिवर्तनको जिम्मा युवाहरुको भएको बताउनुभएको छ । बढ्दै गएको निराशालाई सङ्घर्षकोरुपमा स्थापित गर्दै नेपालमा सम्भावना छ भन्ने अवस्था सिर्जना गरी युवाहरुले मुलुकको परिवर्तन गर्नुपर्ने उहाँको भनाइ छ ।
नवलपरासी (बर्दघाट–सुस्तापूर्व)को गैँडाकोटमा आजदेखि सुरु भएको नेपाल जेसीजको क्षेत्र घ सम्मेलन उद्घाटन गर्दै मन्त्री खड्काले आफू पनि विदेशमा काम गरेर नेपालमा केही गर्नुपर्छ भनेर फर्किएको बताउनुभयो । “विदेश जानु अपराध होइन, त्यहाँ गएर सीप आर्जन गर्नु, मेहनत गर्नु र फेरि आएर स्वदेशमा त्यसको सदुपयोग गर्नु अत्यन्त राम्रो पक्ष हो” उहाँले भन्नुभयो, “त्यसैले नेपालमा केही हुँदैन, केही गर्न सकिँदैन भनेर निर्माण गरिएको गलत भाष्य हटाउने दायित्व समेत युवाहरुकै काँधमा छ ।” मुलुकमा ठूलो परिवर्तन हुन लागेको भन्दै मन्त्री खड्काले युवाहरुले त्यस परिवर्तनलाई बिर्सन लागेकाले सबैलाई सम्झाउनुपर्ने जरुरी रहेको बताउनुभयो ।
“अहिले पूर्वाधारको हिसाबले सबै ठाउँमा बाटोघाटो पुगिसकेको छ, सञ्चारको सुविधा छ, स्वास्थ्यचौकीहरु छन्, विद्यालयहरु छन्, खालि यतिमात्रै हो यिनीहरु व्यवस्थित छैनन्” मन्त्री खड्काले भन्नुभयो, “अब सबैलाई व्यवस्थित गर्नुछ । राजनीतिक हिसाबले पनि मुलुकमा अब स्थायित्व कायम भइसकेको छ । अबको जिम्मेवारी तपाईंहरुको काँधमा छ, यसलाई व्यवस्थित गर्ने युवाहरुको काँधमा छ ।” मुलुकमा आएको परिवर्तनलाई व्यवस्थित गरेर मुलुकलाई समृद्धतर्फ अगाडि बढाउनुपर्ने उहाँले बताउनुभयो । नेपालमा सम्भावनाहरु प्रशस्तै भएका उल्लेख गर्दै मन्त्री खड्काले आफूले सम्हालेको मन्त्रालयको मात्रै कुरा गर्ने हो भने पनि सम्भावना र समृद्धिको बाटो प्रष्ट थाहा हुने बताउनुभयो ।
“हामीहरुले अहिले साढे २८ हजार मेघावाट विद्युत् उत्पादन गर्ने भनेका छौँ” मन्त्री खड्काले भन्नुभयो, “जहाँ ४७ खर्बभन्दा बढीको लगानी हुन्छ, त्यति लगानी गरिँदा कति रोजगारी सिर्जना हुन्छ होला एक पटक विचार गर्नुहोस् ।” त्यहाँ प्रयोग हुने र उत्पन्न हुने रोजगारी महत्वपूर्ण भएको उहाँको भनाइ छ । युवाहरु नराशा नभइ सङ्घर्ष गर्दै हिम्मतले काम गर्नुपर्ने र त्यसमा सरकारले सघाउने उहाँले बताउनुभयो ।
आजदेखि सुरु भएको नेपाल जेसीजको क्षेत्र घ सम्मेलनमा गैँडाकोटदेखि पश्चिमतर्फ महेन्द्रनगरसम्मका जेसीजका ५८ वटा शाखाबाट तीन सय ५० जना सहभागी भएका सम्मेलन निर्देशक गोकुल सापकोटाले बताउनुभयो । गैँडाकोटमा आयोजना गरिएको यस सम्मेलनले गैँडाकोटको पर्यटनसँगै यहाँको सम्भावना र लगानीको अवसरका बारेमा युवाहरुलाई जानकारी गराउने सापकोटाले बताउनुभयो ।
दुई दिनसम्म सञ्चालन हुने यस सम्मेलनमा गोष्ठी, साधारण सभा, सिनेटर बैठक, जुनियर जेसीज बैठक, वक्तृत्वकला प्रतियोगिता, व्यापार कार्ड साटासाट, तालिम सकरात्मक कम्पन, पुरस्कार वितरण लगायतका कार्यक्रम हुने नेपाल जेसीजका अध्यक्ष रवीन पोखरेलले बताउनुभयो । जेसीजको आन्तरिक सम्मेलन भएपनि देशभरबाट प्रतिनिधिहरू आएकाले सम्मेलनलाई यस क्षेत्रको कला, संस्कृतिको प्रदर्शनी, स्थानीय उत्पादनको प्रवद्र्धन एवं पर्यटकीय आकर्षणको माध्यमबाट गैँडाकोटलाई चिनाउन भूमिका खेल्ने पोखरेलको भनाइ छ ।
