चितवन, चैत १- दक्षिण कोरियाले सन् २०२४ मा झन् धेरै नेपाली कामदार लिन चाहेको ग्वार्कोस्थित ईपीएस कोरिया शाखाले जनाएको छ ।

शाखाले बुधबार एक विज्ञप्ति जारी गर्दै सो विषयमा जानकारी गराएको हो । केही दिनयता सामाजिक सञ्जालमा कोरियाले नेपाली कामदार नलिने भन्ने हल्ला फैलिएको भन्दै शाखाले उक्त सूचना तथ्यहीन भएको भन्दै झन् धेरै कामदार लिन खोजेको विज्ञप्तिमा उल्लेख छ ।

शाखाको विज्ञप्तिमा भनिएको छ, ‘कोरियन भाषा परीक्षा उत्तीर्ण गरी रोस्टरमा रहेका कामदारहरूको विवरण फाइल कम्पनीसमक्ष ईपीएस कोरिया शाखाबाट नपठाएको र कोरिया लैजाने कोटा समेत कटौती भएको भन्ने तथ्यहीन र आधारहीन समाचार फैलाइएको प्रति वैदेशिक रोजगार विभाग ईपीएस कोरिया शाखाको ध्यानाकर्षण भएको छ ।’

२०२४ देखि वन क्षेत्र, सेवा क्षेत्र र रुट इन्डस्ट्री क्षेत्रमा समेत गरी अझै धेरै नेपाली कामदार लिने व्यहोरोको पत्राचार कोरिया सरकारबाट प्राप्त भएको शाखाले जनाएको छ । रोजगार अनुमति प्रणाली ईपीएस मार्फत् नेपाली कामदारहरू कोरिया पठाउने कार्य नेपाल सरकार र दक्षिण कोरिया सरकारबीच भएको द्विपक्षीय सम्झौताको आधारमा कार्यान्वयन हुने विषय भएकोले अन्य कुनै पनि पक्षको संलग्नता नहुने पनि शाखाले प्रष्ट पारेको छ ।

विज्ञप्तिमा शाखाले एक पटक कोरियन भाषा परीक्षा उत्तीर्ण गरेकाहरू दुई वर्षसम्म कामदारको सूची (रोस्टर)मा बस्न पाउने जनाएको छ । कोरियाको साना तथा मझौला उद्योगलाई आवश्यक पर्ने कारमदारको उचाइ, तौल, लिंग, उमेर, कामदारको अवस्था र देश जस्ता विवरण खुलाइ कोरिया सरकारको मानव संसाधन विकास (एचआरडी)सेवा समक्ष कामदार माग गरी पठाउँछ । यसरी माग भई गएपछि एचआरडी कोरियाले उक्त मापदण्डलाई मेल खाने गरी रोस्टरमा रहेका कामदारको सूचीबाट १ः३ को अनुपातमा (१ जना कामदारको माग भएको छ भने ३ जना कामदारको विवरण पठाउने) कामदारको विवरण साना तथा मझौला उद्योगमा पठाइन्छ । सो विवरणबाट उद्योगले आफूलाई चाहिने कामदार छनौट गर्दछ । यसरी रोस्टरमा रहेका कामदारहरू कोरिया प्रवेश गरिसकेको ईपीएस शाखाले जनाएको छ । रोस्टरमा रहेका कामदार छनौट कार्य रोजगारदाता मुलुक दक्षिण कोरियाको साना तथा मझौला उद्योगबाट कामदार आवश्यक परेर माग भई आएपछि मात्र हुने शाखाले जानकारी गराएको छ ।