गैँडाकोट / अ.मु. नेवा: गुठिः अमरापुरीको आयोजनामा ने.सं. ११४४ नव वर्षको उपलक्ष्यमा शुभकामना आदानप्रदान कार्यक्रम सम्पन्न भएको छ । अमरापुरीमा आयोजित कार्यक्रमका प्रमुख अतिथि गण्डकी प्रदेशका कृषि तथा भूमि व्यवस्था मन्त्री महेन्द्र ध्वज जिसीले नेपाल संम्वत् नेपाली माटोमा जन्मिएको मौलिक संम्वत्  भएकोले यसलाई कतै पनि शङ्का उपशङ्का नगरी उचित सम्मान गर्नुपर्ने बताउनु भयो । बहुजातीय, बहुसांस्कृतिक, बहुधार्मिक विशेषतायुक्त नेपाली समाज सुदृढ राष्ट्रिय एकताको जगमा उभिएको जनाउँदै विविधतायुक्त मौलिक परम्परा सिंगो राष्ट्रको साझा पूँजीका रुपमा रहेको जिसीले बताउनु भएको छ  ।

अमुगुठीका अध्यक्ष तिलक श्रेष्ठको अध्यक्षतामा सम्पन्न कार्यक्रममा नेवाः पुचः गैँडाकोटका सल्लाहकार अमृत श्रेष्ठ, गैंडाकोट १६ का वार्ड अध्यक्ष विनोद मल्ल, नेवा पुच गैंडाकोट नगर समिति को अध्यक्ष भोजराज श्रेष्ठ ले शुभकामना मन्तव्य व्यक्त गर्नु भएको थियो । राजा राघव देवको पालादेखि सुरु भएको नेपाल संम्वत् राजा पृथ्वी नारायण शाहले शासन लिनु भन्दा अगाडिसम्म प्रचलनमा रहेको नेवाः पुचः गैँडाकोटका सल्लाहकार अमृत श्रेष्ठले जानकारी दिनु भयो ।

कार्यक्रममा अतिथिका रुपमा पूर्ण नारायण प्रधान ,तुलसी प्रसाद श्रेष्ठ, राजेश कुमार श्रेष्ठ,सुरेन्द्र जंग, जीित बहादुर, राजकुमार श्रेष्ठ लगायत उपस्थित हुनुहुन्थ्यो ।नेवा पुच गैंडाकोट नगर समितिको संयोजनमा आज विहान नयाँ वर्ष नेपाल संवत ११४४ को उपलक्ष्यमा नारायणी नदी किनारबाट मोटरसाइकल र्याली अमरापुरी सम्म निकालिएको थियो ।

आज देखि नेपाल संवत् ११४४ सुरु हुँदै 

नेपाल संवत् ११४४ कात्तिक २८ गते(आज) देखि सुरु भएको  छ । नेपालको मौलिक संवतको रूपमा लिइने यस संवतलाई हाल नेवार समुदायले नयाँ वर्षका रूपमा मनाउने गरेका छन् । राष्ट्रिय विभूति शंखधर साख्वाले विक्रम संवत ९३७ ९इस्वी संवत ८८०० मा गरिब जनताको ऋण मोचन गरी नेपाल संवतको सुरु गराएका थिए । सोही संवतका अवसरमा आज देशभर विविध कार्यक्रम आयोजना गरिँदै छन् । नेपाल संवतले पृथ्वीनारायण शाहको शासनकालसम्म राष्ट्रिय संवतको मान्यता पाएको लुम्बिनी बौद्ध विश्वविद्यालयका पूर्वउपकुलपति डा त्रिरत्न मानन्धर बताउँछन् ।

‘लिच्छविकालका राजा राघवदेवको शासनकालबाट सुरु भएको नेपाल संवत् पृथ्वीनारायण शाहको शासनकालसम्म मौलिक संवतका रूपमा चलेको थियो,’ मानन्धर भन्छन्, ‘लिच्छविकाल अघि शक संवत् प्रचलनमा थियो, नेपाल देशको नामबाट राखिएकाले यो मौलिक संवत् हो ।’ विसं २००७ मा प्रजातन्त्रको स्थापना भएदेखि नेपाल संवतलाई राष्ट्रिय मान्यताका लागि अभियान चलाइएको छ । नेपाल संवतलाई नयाँ वर्षका रूपमा काठमाडौं, ललितपुर, भक्तपुर, बनेपा, धुलिखेल, बाह्रबिसे, दोलखा भीमेश्वर, बागलुङ, पर्वत, म्याग्दीलगायत नेवार समुदायको बाहुल्य रहेका स्थानमा विशेष रूपमा मनाउने गरिन्छ ।

गरिब जनताको ऋण मोचन गराई सामाजिक सेवाको उत्कृष्ट नमुना प्रस्तुत गरेको र नेपालमा मौलिक संवतसमेत चलाएको कार्यको उच्च मूल्यांकन गर्दै २०५६ सालको नयाँ वर्षका दिनमा तत्कालीन प्रधानमन्त्री कृष्णप्रसाद भट्टराईले साख्वालाई राष्ट्रिय विभूति घोषणा गरेका थिए । विसं २०६५ मा प्रधानमन्त्री प्रचण्डले नेपाल संवतले राष्ट्रिय मान्यता पाउने घोषणा गरेका थिए । कात्तिक कृष्ण औँसीका दिन बही खाता बन्द गरी नयाँ वर्ष अर्थात् कात्तिक शुक्ल प्रतिपदाका दिन नयाँ बही खाताको सुरुवात गर्ने परम्परासमेत काठमाडौंमा अझै छ ।