काठमाडौं । पछिल्लो समय सामाजिक सञ्जालका विभिन्न प्लेफर्ममा आधा आँखा खोल्दा मात्र अनुहार देखिने फोटो खुबै चर्चामा छन् । विभिन्न सेलिब्रेटीहरूको फोटो राखेर सामाजिक सञ्जाल प्रयोगकर्ता व्यक्ति पहिचान गर्न अनुरोध गरिरहेका छन् ।

त्यस्ता फोटो झट्ट हेर्दा चिनेजस्तो पनि लाग्छ, कहिल्यै नदेखेको जस्तो पनि लाग्छ । तर, आँखा अलिकति मात्र बन्द गर्‍यो भने फोटो कसको हो भन्ने प्रष्ट चिनिन्छ ।

कतिपय फोटो डाँडामा भएको देखिन्छन्, कतिपय पहाडमा, कतिपय समुन्द्रमा अनि कतिपय जङ्गलमा । यस्ता फोटो एआई अर्थात् आर्टिफिसियल इन्टेलिजेन्सले बनाएको हो । प्रयोगकर्ताले दिएको प्रम्प्टका आधारमा इलुजन फोटो तयार हुन्छ ।

यस्तो फोटोलाई ‘इलुजन डिफ्युजन’ (illusion diffusion) फोटो भन्ने गरिन्छ । आज हामी त्यस्ता इलुजन डिफ्युजन फोटो कसरी बनाउन सकिन्छ भन्ने विषयमा जानकारी दिंदैछौं ।

– सबैभन्दा पहिले यहाँ क्लिक गरेर हगिङ फेस डट सीओ वेबसाइटको इलुजन डिफ्युजन साइटमा जानुहोस् ।

– त्यसपछि ‘ड्रप इमेज हियर अर क्लिक टु अपलोड’ लेखेको बक्समा क्लिक गरी आफूले इलुजन डिफ्युजन बनाउन चाहेको फोटो छान्नुहोस् ।

– अनि तल भएको इलुजन स्ट्रेन्थ लेखेको सेक्सनमा बढाउने र घटाउने सुविधा हुन्छ । निलो लाइन अगाडि सार्‍यो भने फोटो प्रस्ट चिनिने हुन्छ । निलो लाइन सानो राख्यो भने फोटो चिन्न मुस्किल पर्छ ।

– यति गरेपछि प्रम्प्ट भन्ने सेक्सन हुन्छ । त्यसमा तपाईंले आफूले छानेको फोटो केमा देखिने बनाउने त्यो छान्न सक्नुहुन्छ । (उदाहरणका लागि A hill, jungle and mountain राख्न सक्नुहुन्छ ।)

– अनि  तल रहेको रनको अप्सनमा ट्याप गर्नुहोस् ।

– रन गरिसकेपछि माथि वार्निङको अप्सन आउँछ । त्यसले खासै केही फरक पार्दैन। केही समय पर्खिनुहोस् । यतिबेला तल फोटो तयार भइरहेको हुन्छ । फोटो तपाईंको इन्टरनेट स्पिड कति छ भन्नेले ढिलो चाँडो जेनेरेट हुन्छ ।

– तलको बक्समा फोटो तयार भइरहेको देखिन्छ । इन्टरनेटको स्पिड अनुसार फोटो न्यूनतम एक मिनेटमा तयार हुन्छ ।

-फोटोको माथि रहेको डाउनलोडको आइकनमा क्लिक गरेर सेभ गर्न सकिन्छ ।