चितवन : चितवन महोत्सव सञ्चालनमा कडाइ गरिएको छ । वढ्दो कोरोना भाइरसको तेस्रो लहर (ओमिक्रोन) को संक्रमणका कारण महोत्सव सञ्चालनमा कडाइ गरिएको हो । सोमवार भएको जिल्ला कोभिड–१९ संकट व्यवस्थापन समन्वय केन्द्र (डिसिसिएमसी) र सर्वदलीय सर्वपक्षीय बैठकले जारी चितवन महोत्सव अव दुईदिन मात्र चल्ने निर्णय गरेको छ ।

उद्योग वाणिज्य संघ चितवनको आयोजनामा चितवन महोत्सव आइतबारदेखि नारायणी नदी किनारमा सुरु भएको हो । चितवन महोत्सव सुरु भइसकेकाले थप दुई दिन चल्न दिने र अरु महोत्सव सुरु गर्न नदिने निर्णय भएको सहायक प्रमुख जिल्ला अधिकारी चिरञ्जिवी शर्माले जानकारी दिनुभयो ।

गृह मन्त्रालयले सोमबार सार्वजनिक स्थानमा २५ जनाभन्दा बढीको संख्यामा भेला हुन नदिने निर्णय गरिसकेको छ ।

१३औँ संस्करणको चितवन महोत्सव आइतबारदेखि सुरु भएको हो । उद्योग वाणिज्य संघ चितवनले आयोजना गरेको महोत्सवको बागमती प्रदेशका मुख्यमन्त्री राजेन्द्र पाण्डेले उद्घाटन गर्नुभएको हो ।

तेस्रो लहरको कोरोनाको जोखिम बढेपछि भिडभाड हुने गतिविधि बन्द गर्न कोभिड–१९ संकट व्यवस्थापन समन्वय केन्द्र (सिसिएमसी)ले आइतबार सरकारलाई सिफारिस गरेको हो ।

यता शिक्षा मन्त्रालयले पनि माघ १५ गतेसम्म विद्यालय बन्द गर्ने निर्णय गरिसकेको छ ।

सरकारले विद्यालय बन्द गर्ने निर्णय गरेसँगै जिल्लामा सञ्चालित र सञ्चालनको तयारीमा रहेका महोत्सवको विषयमा निर्णय गर्न सोमबार सर्वपक्षीय बैठक बसेको हो ।

पछिल्लो २४ घण्टामा देशभरका २ लाख १० हजार ५ सय ९४ जनालाई कोरोनाविरुद्धको खोप लगाउँदा ७ हजार ८ सय ५५ जना सक्रिय संक्रमित रहेका छन् ।

जसका कारण देशको स्थिती अझ भयावह नहोस् भन्ने उद्धेश्यले सचेतना अपनाउन लागिएको मन्त्रालयको भनाइ रहेको छ ।

कोरोना भाइरसको यो तेस्रो लहरले भोली जस्तो रुप पनि लिन सक्ने अवस्था रहेको हुदा जनमानसमा चेतना जगाउन अत्यावश्यक रहेको हुदा यो निर्णय गरिएको मन्त्रालयको भनाइ छ । जनतालाइ अव विशेष सचेत रहन पनि आग्रह गरिएको छ ।