काठमाडौं । ब्राह्मणले क्षेत्रीमाथि जातीय विभेद गरेको भन्दै प्रहरीमा जाहेरी दर्ता भएको छ । पाल्पाकी मोना थापाले आफू क्षेत्री समुदायकै व्यक्ति भएका कारण आफ्ना श्रीमान र श्रीमानका परिवार एवं आफन्तले जातका आधारमा विभेद गरेको भन्दै जिल्ला प्रहरी कार्यालय पाल्पामा जाहेरी दर्ता गराएकी हुन् ।
बुधबार उक्त जाहेरी दर्ता भएको जिल्ला प्रहरी प्रमुखसमेत रहेका प्रहरी उपरीक्षक (एसपी) जनक शाहीले नेपाल प्रेसलाई जानकारी दिए ।जाहेरी दर्ता भइसकेपछि प्रहरीले अनुसन्धान गर्ने प्रक्रिया अघि बढिसकेको उनको भनाई छ ।
मोनाले श्रीमान अनुपम भुसाल, कान्छो ससुरा मोहन भुसाल, कान्छी सासु सिता भुसाल, जेठाजु सुमन भुसाल र पवन भुसाल, जेठानी दिया भुसाल र केशरी भुसालले आफूमाथि निरन्तर जातीय विभेद गरेको भन्दै जाहेरी दर्ता गराएकी हुन् । साउन ९ गतेदेखि २५ गतेसम्म १७ दिनको निरन्तर संघर्षपछि वुधबार जाहेरी दर्ता भएको हो ।
यसअघि पटक–पटक जाहेरी दर्ता गर्न अस्वीकार गरेको जिल्ला प्रहरी कार्यालय पाल्पाले हुलाकमार्फत पठाएको जाहेरी वुधबार दर्ता गराएको हो । यसअघि पटक–पटक “यो जातीय विभेदको घटना नै हैन’ भन्दै प्रहरीले जाहेरी नलिएर फर्काइदिएको पीडित थापाले नेपाल प्रेससँग बताइन् ।
प्रत्यक्ष जाहेरी लिएर जाँदा प्रहरीले दर्ता गर्न अस्वीकार गरेपछि हुलाकमार्फत जाहेरी पठाउनु परेको अधिवक्ता यमकुमारी ददेलले नेपाल प्रेससँग बताइन् । उनका अनुसार गैरदलितबीचको जातीय विभेदको घटनामा दर्ता भएको सम्भव त पहिलो घटना हो ।
जात व्यवस्था उन्मूलन मोर्चा, नेपाल’ लुम्बिनी प्रदेश र ‘वैज्ञानिक समाजवादी कम्युनिष्ट पार्टी, नेपाल’ लुम्बिनी प्रदेशको निरन्तरको दबाबपछि प्रहरीले जाहेरी दर्ता गरेको ‘जात व्यवस्था उन्मूलन मोर्चा, नेपाल’का सचिव महाविर विश्वकर्माकाे दाबी छ ।
जाहेरी:
