मोरङ – विवाह गर्ने प्रलोभन देखाएर मोरङको बेलबारी नगरपालिकास्थित जंगलमा एक बालिकाको बलात्कार भएको घटना बाहिरिएको छ।

बेलबारी–८ का २१ वर्षीय सन्तोष नेपालीले १४ वर्षीया एक बालिकालाई विवाह गर्ने प्रलोभन देखाएर जंगलमा लगेर बलात्कार गरेको जिल्ला प्रहरी कार्यालय मोरङले जनाएको छ।

मोरङ प्रहरीका प्रवक्ता एवं प्रहरी नायब उपरीक्षक दीपक कार्कीका अनुसार बालिका गत सोमबार बेलुका करिब ५ बजे बलात्कृत भएकी हुन्। विवाहको आश्वासनसँगै जंगलमा निगुरो टिप्न जाने बहानामा सिंहदेवी सामुदायिक वनमा बलात्कार गरेको प्रहरी अनुसन्धानबाट खुलेको उनले जानकारी दिए।

पथरीशनिश्चरे नगरपालिकाकी स्थानीय बालिका दिदीको घर बेलबारी आएको अवस्थामा नेपालीसँग चिनजान भएको प्रारम्भिक अनुसन्धानले जनाएको छ।

प्रहरी प्रवक्ता श्रेष्ठका अनुसार चिनजानकै भरमा जंगलमा निगुरो टिप्न बोलाएर नेपालीले करणी गरेका थिए। पीडित बालिकाको शरीरको विभिन्न भागमा चोट देखिएको श्रेष्ठले बताए।

आर्थिक अवस्था एकदमै कमजोर रहेको बालिकाको परिवारलाई घटनापछि नेपालीका परिवारका सदस्यले अस्वीकार गर्दै आएका बताइएको छ। नेपालीका परिवारले बालिका र उनको परिवारलाई धम्की पनि दिएको खुलेको छ।

प्रहरीसमक्ष घटना पुगेपछि नेपालीलाई इलाका प्रहरी कार्यालय बेलबारीले पक्राउ गरेको थियो। पक्राउ परेका नेपालीविरुद्ध जबरजस्ती करणी मुद्दा चलाउन अदालतबाट बुधबार म्याद थप गरेर घटना अनुसन्धानको बाँकी प्रक्रिया अघि बढाएको मोरङ प्रहरीले जनाएको छ।