भरतपुर । भरतपुर महानगरपालिका–१२ का २८ वर्षीय अनिल परियार (कान)को हत्यासम्बन्धी मुद्दा चितवन अदालतमा पुगेको छ । अदालतमा साउन २० गते शुक्रबार मुद्दा दर्ता भएको हो । आइतबार एक जनाको मात्र बयान भएको छ । न्यायाधीश रितेन्द्र थापाको इजलासमा मुद्दा परेको छ । संगठित अपराध र मनशायपूर्वक हत्या गरेको भनी प्रहरीले मुद्दा चलाएको हो ।

कानको हत्यामा संलग्न आरोपमा ३ युवालाई चितवन प्रहरीले पक्राउ गरेको छ । घटना भएको एक महिनापछि जेठ २४ गते उनीहरु पक्राउ भएका हुन् ।

पक्राउ पर्नेमा भरतपुर महानगरपालिका वडा नं–१५ बस्ने वर्ष ३५ को विश्व भन्ने हेमन्त बास्तोला, भरतपुर महानगरपालिका वडा नं–१२ बस्ने वर्ष २३ को राहुल परियार र माडी नगरपालिका घर भई हाल भरतपुर–१५ मा डेरा गरी बस्ने वर्ष २५ को रोहित सिलवाल रहेका छन् ।

बास्तोला काठमाडौँबाट पक्राउ परेका हुन् भने परियार र सिलवाल चितवनबाट पक्राउ परेका हुन् । परियारले दिएको किटानी जाहेरीका आधारमा उनीहरु पक्राउ परेको प्रहरीको भनाइ छ ।

घटनामा संलग्न भनिएका व्यक्ति भरतपुर महानगरपालिका वडा नं–२६ बस्ने अजय भन्ने अशोक भण्डारी, भरतपुर महानगरपालिका वडा नं–१९ बस्ने सुशान्त उप्रेती र भरतपुर महानगरपालिका वडा नं–१५ बस्ने तिलक गैरे भने फरार रहेको चितवन प्रहरी प्रवक्ता डिएसपी नरहरि अधिकारीले बताए ।

हत्यामा एक जना अजय सिंह भन्ने भारतीय नागरिक संलग्न रहेको भनी प्रहरीले प्रारम्भिक चरणमा जानकारी दिएको थियो । फरारमध्येकै अशोक भण्डारी नै अजय रहेको प्रहरीले जनाएको छ, तर उनी हालसम्म पक्राउ परेका छैनन् ।

भरतपुर–१२ का अनिल परियार (कान)को हत्यासम्बन्धमा अनुसन्धानका लागि केन्द्रीय अनुसन्धान ब्युरो (सिआइबी) र प्रहरीको बागमती प्रदेशबाट पनि एउटा टोली खटिएको थियो । चितवन प्रहरी पनि लागिपरेको छ ।

भरतपुर महानगरपालिका–७ स्थित कृष्णपुर खेल मैदाननजिकै वैशाख २५ गते राति ७ः३० बजेको समयमा अज्ञात समूहले परियारलाई हतियार प्रयोग गरी हत्या गरेको चितवन प्रहरीले जनाएको छ ।