काठमाडौं । म सरकारबाट बाहिरिनुपर्ने भयो भने मेरो लागि अध्यक्ष (माधवकुमार नेपाल) मेरेतुल्य भयो । केही दिन अघि सबैका अगाडि नेकपा एकीकृत समाजवादीकी सचिव रामकुमारी झाँक्रीले पार्टी अध्यक्ष माधवकुमार नेपाललाई भनिएको शब्द हो यो । त्यसपछि नेपालको शीर घोप्टियो, केही बोल्नुभएन ।

पार्टीले मन्त्रीहरु फिर्ता बोलाउँने निर्णय गरिसकेको छ राजीनामा दिएर मार्ग खोल्नुस् भन्दै अध्यक्ष नेपाल बसिरहेको ठाउँबाट उठ्नुभयो । त्यसपछि शहरी विकासमन्त्री रामकुमारी झाँक्रीले पदबाट राजीनामा दिनुभयो ।

मन्त्रालयको बिदाई कार्यक्रममा रुँदै बाहिरिनुभयो । त्यसपछि पत्रकार ऋषि धमलाको कार्यक्रममा झाँक्रीले आफूले ६ महिनाको लागि मात्रै मन्त्री बन्छु भनेर पार्टी अध्यक्ष माधवकुमार नेपालसँग सही छाप गरेर मन्त्री नबनेको स्पष्ट पार्नुभएको छ ।

मन्त्रीबाट राजीनामा दिएलगत्तै प्राइम टिभीको चर्चित कार्यक्रम जनता जान्न चाहन्छनको लागि पत्रकार ऋषि धमलासँगको कुराकानीमा उहाँले यस्तो बताउनुभएको हो । उहाँले समाजवादी पार्टीकै कारण आफू मन्त्री बनेको स्मरण गराउनुभयो ।

झाँक्रीले आफू भावुक प्रकृतिको व्यक्ति भएकोले आँशु रोक्न नसक्ने बताउनुभयो । र, यो आफ्नो कमजोरी भएकोले अब ४० वर्ष काटिसकेकोले यो कमजोरी सुध्रिने सम्भावना नरहेको उहाँको भनाई छ ।

उहाँले आजकै दिनमा एमाले र एकीकृत समाजवादीबीच एकताको सम्भावना नरहेको तर यतातर्फ सोच्नुपर्ने दिन आएको बताउनुभयो ।

उहाँले भन्नुभयो, पार्टी एकता वा सहकार्यको सम्भावना भने सधैं जीवित छ । उहाँले आफूलाई मन्त्री बनाउनको लागि भूमिका खेलेको भन्दै पार्टी अध्यक्ष माधवकुमार नेपाल र सम्मानित नेता झलनाथ खनाललाई धन्यवाद दिनुभयो ।

प्रमुख प्रतिपक्षी दल नेकपा (एमाले) का अध्यक्ष केपी शर्मा ओलीबारे भने उहाँले मन्त्री हुँदा टिकाटिप्पणी वा आलोचना नगरेको स्मरण गराउँदै अहिलेपनि उत्तिकै सम्मान रहेको सुनाउनुभयो ।