चितवन – चितवनको भरतपुरस्थित सप्तगण्डकी बहुमुखी क्याम्पस प्रमुखको कार्यकक्षमा तालाबन्दी गरिएको छ ।
प्राध्यापक हातपात प्रकरणलाई लिएर अखिल नेपाल स्वतन्त्र विद्यार्थी यूनियन (क्रान्तिकारी) सप्तगण्डकी इकाईले आज (आइतबार) क्याम्पस प्रमुखको कार्यकक्षमा अनिश्चितकालिन तालाबन्दी गरेको हो । क्याम्पसका प्राध्यापक गिरीराज उपाध्यायमाथि केही दिन अघि कक्षाकोठामा पढाईरहेको समयमा नै हातपात भएको थियो ।
क्याम्पस प्रशासनले हातको घटनाको अभिलेखिकरण तथा दोषीलाई कारबाही गर्न नसक्ने बताएकोले वाध्य भएर तालाबन्दी गर्नु परेको अनेरास्ववियु (क्रान्तिकारी) सप्तगण्डकी इकाईका संयोजक प्रकाश देवकोटाले बताए ।
घटनाको अभिलिखिकरण र दोषीलाई कारबाहीको माग गर्न क्याम्पस प्रशासनले नजरअन्दाज गरेको देवकोटाको भनाइ छ । उनले घटनाको अभिलेखिकरण र दोषीलाई कारबाहीको प्रतिवद्धता नगरेसम्म तालाबन्दी जारी रहने समेत जानकारी दिए ।
