काठमाडौँ : नेपाल-अमेरिका अन्तर्राष्ट्रिय चलचित्र महोत्सवको पाँचौं संस्करण आगामी असार ९ देखि १२ मा आयोजना हुने भएको छ । वासिङ्टन डीसी महानगर क्षेत्रमा केन्द्रित रहेर आयोजना गरिने पाँचौं अन्तर्राष्ट्रिय चलचित्र महोत्सवसका लागि विश्वभरिबाट आवेदन खुला गरिएको छ ।

अमेरिकाको मेरिल्यान्ड राज्यमा स्थापित गैरनाफामूलक संस्था नेपाल-अमेरिका फिल्म सोसाइटीले सन् २०१७ देखि प्रत्येक वर्ष यो महोत्सवको आयोजना गर्दै आएको छ । महोत्सवसमा नेपालका फिचर फिल्म, वृत्तचित्र, छोटा फिल्म, एनिमेसनका साथै सबै विधाका फिल्महरू प्रदर्शन गरिनेछन् । नेपाल बाहेक अमेरिका, दक्षिण एसियासहित विभिन्न देशका स्वतन्त्र फिल्महरू यस महोत्सवको उच्च प्राथमिकतामा पर्नेछन् ।

गत वर्षदेखि वासिङ्टन डीसी, मेरिल्यान्ड र भर्जिनियाका स्थानीय फिल्महरूलाई प्रोत्साहान गर्न ‘डीएमभी क्लोजअप’अन्तर्गत प्रदर्शन सुरु भएको छ ।

महोत्सवमा प्रदर्शन गरिएका फिल्महरूलाई अवार्डहरूबाट पुरस्कृत पनि गरिनेछ । महोत्सवको अवधिमा फिल्म, संस्कृति र नयाँ प्रविधिबारे प्यानल छलफल तथा कार्यशालाहरू पनि आयोजना गरिने बताइएको छ । फिल्म प्रदर्शनपछि उपस्थित निर्देशक, निर्माता तथा कलाकारसँग अन्तरक्रिया कार्यक्रम पनि आयोजना गरिनेछन् ।