भरतपुर महानगरले महानगरभित्रका पाँचवटा सरकारी विद्यालयलाई स्कुल बस प्रदान गरेको छ ।

सामुदायिक विद्यालयको शिक्षाको स्तर विकास गरी विद्यार्थी र अभिभावकको प्रमुख रोजाइमा पार्ने योजना र उद्देश्यका साथ महानगरले नारायणी नमुना मावि, कविलास मावि, भीमनगर मावि, प्रभात मावि र लक्ष्मी माविलाई स्कुल बस हस्तान्तरण गरेको हो ।

महानगरले बुधबार एक समारोहका बीच मेयर रेनु दाहालले सम्बन्धित विद्यालयका अध्यक्ष र प्रधानाध्यापकहरुलाई बसको चाबी हस्तान्तरण गरी बस प्रदान गरेकी हुन् ।

महानगरका प्रमुख प्रशासकीय अधिकृत भोजराज खतिवडाका अनुसार रुट प्रमिट र इन्स्योरेन्ससहित प्रतिबसको लागत १९ लाख ९८ हजार रुपैयाँ रहेको छ । अघिल्लो आर्थिक वर्षको बजेटबाट महानगरले विद्यालयलाई बस प्रदान गरेको उनले बताए । चालु आर्थिक वर्षमा पनि स्कुल बस दिने कार्यक्रमलाई निरन्तरता दिइने उनको भनाइ छ ।

महानगरले यसअघि विद्यार्थीका लागि साइकल हस्तान्तरण गरेको थियो भने विद्यालयको भौतिक संरचना सुधारदेखि शैक्षिक सुधारका धेरै राम्रा कार्यक्रमहरु गरिसकेको खतिवडाले बताए ।

महानगरको शिक्षाको स्तर सुधार गरी सामुदायिक विद्यालयलाई अभिभावक र विद्यार्थीको प्रमुख रोजाइको केन्द्रका रूपमा विकास गर्न महानगरले शिक्षा विकासको कार्यक्रमअन्तर्गत यसपटक पाँच विद्यालयलाई स्कुल बस हस्तान्तरण गरेको मेयर रेनु दाहालले बताइन् । यही स्थितिमा सरकारी विद्यालयको शैक्षिक विकास हुँदै गए आगामी चार वर्षमा निजी स्कुल छाडेर सरकारी विद्यालयमा भर्ना हुने लर्को लाग्ने उनले दाबी गरिन् । विद्यालयलाई प्रदान गरिएको स्कुल बसको सही प्रयोग गर्न पनि उनले आग्रह गरिन् ।

भरतपुरको नारायणी नमुना माविले चितवनकै इज्जत राखेको भन्दै दाहालले सबै विद्यालयको शैक्षिक विकासको स्तर त्यही अनुपातमा पु¥याउन चाहेको बताइन् ।

भरतपुर महानगरलाई शैक्षिक सहरका रूपमा विकास गर्ने आफ्नो योजना रहेको बतााउँदै उनले महानगरभित्र त्रिभुवन विश्वविद्यालयअन्र्तगत आंगिक इन्जिनियरिङ कलेज, प्रहरी स्कुल, भरतपुर बहुप्राविधिक शिक्षालय ल्याउन सफल भएको र खुल्ला विश्वविद्यालय पनि यहीँ ल्याउन पहल गरिरहेको बताइन् ।

भरतपुर महानगरका शैक्षिक प्रशासन महाशाखा प्रमुख महेन्द्र पौडेलले विद्यालयको शैक्षिक विकाससँगै विद्यार्थी र अभिभावकमा थप ऊर्जा दिलाउन बिद्यालयलाई स्कुल बस हस्तान्तरण गरिएको बताए ।

किशोरीहरुलाई साइकल, लोपोन्मुख र सीमान्तकृत समुदायका बालबालिकाका लागि छात्रवृत्ति, द्वन्द्व प्रभावित बालबालिकाका लागि शैक्षिक सहयोग, अपागङ्ता भएका बालबालिकाका लागि शैक्षिक सिकाइलगायत थुप्रै सेवा सुविधाहरु महानगरका तर्फबाट प्रदान गरिएको उनले बताए । शैक्षिक विकासमा महानगरले गरेको प्रयासको प्रतिफलस्वरुप सामुदायिक विद्यालयमा पाँच हजार ६०० जना विद्यार्थी थप भएको बताए । संख्यात्मक नभई गुणस्तरमा पनि सुधार गर्ने आफूहरुको अपेक्षा रहेको उनको भनाइ छ ।

कार्यक्रममा नारायणी नमुना माविका प्राचार्य पूर्णप्रसाद दवाडीले महानगरका मेयर दाहाल र उनको टिमको सही योजना र कार्यक्रमका कारण महानगरका सरकारी विद्यालयको शिक्षाको स्तर विकासमा सहयोग भएको बताए । जसका कारण विद्यालयको शैक्षिक स्तर विकासदेखि सरकारी विद्यालयलाई प्रतिस्पर्धी बनाउन र विद्यार्थीको आकर्षण बढाउन सहयोग पुग्ने उनले बताए ।