प्रहरीले फुल्चोकीमा हिउँ खेल्न जाने क्रममा हराएका दुई जनाको उद्धार गरेको छ ।

महानगरीय प्रहरी प्रभाग बाडेगाउँबाट खटिएको टोलीले आइतबार गोदावरी नगरपालिका–२ चापाखर्कबाट सिन्धुलीका २१ वर्षीय प्रशान्त थापा र दोलखाका १९ वर्षीय सुरेश केसीको उद्धार गरेको हो ।

प्रहरीले फुल्चोकी धुम्न जानेलाई प्रत्येक वर्षझैं यस वर्ष पनि कडाइ गरेको छ । फुल्चोकी प्रवेश गर्ने मुख्य नाकामा आइतबारबाट प्रहरीले जाँच, नाम ठेगाना सम्पर्क नम्बरको रेकर्ड, नक्सा र सचेतनामूलक बोर्ड राखेर भौगोलिक अवस्थाबारेमा जानकारी दिने व्यवस्था मिलाइएको छ ।

महानगरीय प्रहरी परिसर जावलाखेलका एसपी प्रज्जवल महर्जनले पैदल जाने पर्यटकलाई दिउँसो एक बजे र सवारी साधनमा जानेलाई २ बजेसम्म मात्र प्रवेश गर्न दिने व्यवस्था मिलाएको बताए । ‘दैनिक पाँच सय जनासम्म मात्र पठाउने गरेका छौं,’ उनले भने ।

फुल्चोकीमा जाडोयाममा हिउँ खेल्ने जानेको घुँइचो लाग्ने र बाटो बिराएर धेरै मानिसहरु हराउने र मृत्यु समेत हुने गरेको तथ्यांक छ । २०७४ सालमा फुल्चोकी जंगलमा हराएको जोन तामाङको सातौं दिन मात्र फेला परेको थियो ।