कोरोना भाइरस (कोभिड १९) संक्रमण फैलिँदै गएपछि मस्र्याङदी गाउँपालिकाको वडा नं. ६ दिङदिङका स्थानीयले एक घरबाट अर्को घर जान नपाउने नियम बनाएका छन् ।
वडाको बाहुनडाँडा, दिङदिङमा कोरोना संक्रमण बढ्दै गएपछि स्थानीयले सतर्कता अपनाएको हो । आफ्नो घरबाट अर्काको घर नजाने र अरुलाई पनि आफ्नो घरमा आउन नदिने नियम बनाएको स्थानीय विष्णु गुरुङले बताउनुभयो । उहाँका अनुसार यो नियम १० दिनसम्मका लागि बनाइएको हो । दिङदिङ टोल सुधार समितिका अध्यक्ष लालबहादुर गुरुङ, शान्तिदिप युवा क्लबका अध्यक्ष मिनराशी गुरुङ, आमा समूहका अध्यक्ष इन्दिरा गुरुङलगायत बुद्धिजिवीहरुको भेलाबाट उक्त निर्णय गरिएको हो । सबैलाई एक घरबाट अर्को घर नजान र आफ्नो कामले घर बाहिर जान परेमा अनिवार्य मास्क लगाउन, स्यानीटाइजर प्रयोग गर्न भनिएको छ । खेतबारीमा काम गर्न जान परेमा आफ्नो परिवार मात्र जान पाउने र खेताला लैजान नपाउने भएको छ ।
अधिकांश स्थानीयमा रुघाखोकी लाग्ने, ज्वरो आउने र केहीलाई स्वाद नआउने, ज्वरो आउने भएको छ । केही स्थानीय ८÷१० दिनसम्म विरामी परेपछि कोरोना परीक्षण गरिएको थियो । ८ जनामा कोरोना पोजेटिभ देखिएको छ । लक्षण देखिएकाहरुलाई कोरोना जाँचका लागि स्थानीय युवाले पहल गरेपनि केही परीक्षण गर्न मानेका छैनन् । संक्रमित भने होम आइसोलेसनमै रहेका छन् । एक छिमेकीले अर्को छिमेकीलाई पटकपटक साबुनपानीले हात धुन, सामाजिक दुरी कायम गर्न अनुरोध गरेको शान्तिदिप युवा क्लबका अध्यक्ष मिनराशी गुरुङ बताउनुभएको छ । उहाँका अनुसार सामाजिक कार्यहरु गर्न रोक लगाइएको छ । स्थानीयमा कोरोना संक्रमण देखिन थालेपछि उच्च सतर्कता अपनाएको हो ।

गाउँको शान्तिदिप युवा क्लब, आमा समूह, बाबा समूहको पहलमा हरेक घरमा स्वास्थ्य सामाग्री प्रदान गरेको छ । कोरोना संक्रमण जोखिमबाट बच्नका लागि युवा क्लब, आमा समूह र बाबा समूहबाट २० हजार रकम बराबरको मास्क र सेनिटाईजर खरिद गरी घरघरमा वितरण गरिएको हो । ५१ घरमा प्रति घर ५ सय एमएलको सेनिटाईजर र एक प्याकेट मास्क वितरण गरिएको छ । गाउँलेका बीचमा आफ्नो गाउँ टोलमा कोरोना सम्बन्धी जानकारी गराउने, अनावश्यक भिडभाड नगर्न सुझाव दिने, आवश्यकता अनुसार स्वास्थ्य सामाग्री प्रदान गरिने, स्वास्थ्यकर्मीसंग परामर्श लिने, संक्रमितको मनोबल बढाउने खालका काम गर्ने सहमति भएको छ ।