चितवन, जेठ ०५-  चितवनमा टिभिएसको किङ्सको तीन पाङ्ग्रे विद्युतिय अटो सार्वजनिक गरिएको छ । जगदम्बा मोटर्सस अन्तरगतको मालाश्री मोटर्सले अधिक कमाई, अबल रोजाइ भन्ने नाराका साथ  सोमबार नारायणगढमा एक कार्यक्रमको आयोजना गरी विद्युतिय अटो सार्वजनिक गरेको हो ।

पेट्रोलियम पदार्थको मूल्य बढिरहेको अवस्थामा चितवनमा विद्युतिय अटो बजारमा ल्याएको मालाश्रीका प्रोजेक्ट हेड हरि न्यौपानेले जानकारी दिनुभयो । उहाँका अनुसार एक पटक फुल चार्ज गरिएको यस विद्युतीय अटोले सडक राम्रो भएको तराई क्षेत्रमा १७९ किलोमिटरसम्म गुड्न सक्नेछ । यद्यपि पहाडी तथा हिमाली क्षेत्रमा न्यूनतम सय किलोमिटरसम्म गुड्ने न्यौपानेको दावी छ । प्रतिघण्टा ६० किलोमिटरसम्म गुड्ने उहाँले बताउनुभयो । विद्युतीय अटो सस्तो र सर्वसुलभ समेत हुने उहाँले बताउनुभयो ।

‘सय किलोमिटर गुड्दा कम्तिमा ४ लिटर पेट्रोल लाग्छ । सय किलोमिटर गुडेको विद्युतीय ९२ रुपैयाँको विद्युत खपत गर्छ,’ उहाँले भन्नुभयो ‘कम्तिमा साढे तीन वर्षमा अटोले आफ्नो खर्च उठाउँछ।’ उहाँका अनुसार यस अटोलाई आठ लाख २४ हजार ९०० रुपैयाँमा पर्दछ ।

चितवनमा टिभिएस किङ्सका सामान सन् २०१६बाट भित्रिएका हुन् । त्यसलाई परिमार्जन गर्दै टिभिएस किङस जिएस २०० सिसिको भेरियन्ट नेपाली बजारमा ल्याइएको थियो । त्यस्तै सन् २०१९मा कम्पनीले २२५ सिसि क्षमताको नयाँ भेरियन्ट टिभिएस किङस डुरामेक्स बजारमा ल्याएको मालाश्री मोटर्सका प्रमुख भिमसेन श्रेष्ठले जानकारी दिनुभयो । अहिले यसलाई परिमार्जन गर्दै कम्पनीले नेपालमा पहिलोपटक विद्युतीय मोडलको टिभिएस किङस इभि म्याक्स सार्वजनिक गरेको बताउनुभयो । उहाँका अनुसार नेपालमा बिक्री हुने अटो मध्ये ७० प्रतिशत अटो टिभिएसकै छन् ।

उद्योग वाणिज्य संघ चितवनका अध्यक्ष चिरञ्जीवि सुवेदीले विद्युतीय सवारी साधनले वातावरणलाई स्वच्छ राख्न महत्वपूर्ण भूमिका खेल्ने बताउँदै युवाहरुलाई स्वरोजगार समेत दिने बताउनुभयो । अहिले अटो चलाउने अधिकांश चालकसँग सवारी चालक अनुमति पत्र नभएको बताउँदै उहाँले यसका लागि आवश्यक सहयोग गर्न उद्योग वाणिज्य संघ तयार रहेको समेत बताउनुभयो ।

उद्योग वाणिज्य संघ चितवनका उपाध्यक्ष राजन पियाले चितवनमा विद्युतीय सवारी साधनको माग बढ्दो रहेको बताउनुभयो । विद्युतीय सवारी साधनले विदेशी नेपाली पैसा विदेशमा जानबाट रोक्ने बताउँदै यस तर्फ राज्यले समेत विशेष ध्यान दिनुपर्ने उहाँको भनाई छ ।

जिल्ला ट्राफिक प्रहरी कार्यालय चितवनका प्रमुख अनिल थापाले वातावरण मैत्री सवारी साधन चितवनमा भित्रनु राम्रो भएको बताउँदै सवारी दुर्घटना न्यूनिकरण तर्फ अगाडि बढ्नुपर्ने बताउनुभयो । थापाका अनुसार चितवनमा यसवर्ष ठुलो दुर्घटना मध्ये अटो दुर्घटना रहेको छ । एउटा अटो दुर्घटना हुँदा चार जनाको मृत्यु भएको थियो । उहाँका अनुसार चितवनमा सवारी दुर्घटनाबाट औसतमा तीन दिनमा एक जनाको मृत्यु हुने गरको छ ।